Shillong, Naiwieng, 11: U Gurpez Singh u la ujor sha ki Pulit ban pyntip ba ha ka 9 tarik mynta u bnai ha ka por 6.25 baje mynstep, saw ngut ki briew ki bym lah ban ithuh kiba kam ïalade ba ki dei na ka Vehicle Finance Department ki la kurup i aka trok jong u kaba don ïa u nombar NL-01AJ-8095 bad rahbor ruh ïa u nongniah kali jong u, u Raj Kumar uba la 38 snem.
Ha ka ujor, Gurpez Singh, u la ïathuh ba ki briew bym lah ban ithuh durkhmat ki la pyndih ïa u da u drok bad lute ïa ka mobile phone jong u bad ïa ka pisa T. 4,000 hajar.
Hadien kata, ki runar ki la iehnoh marwei ïa u nongniah kali.
Ki runar ki bym lah ban ithuh durkmat ha ka 7 tarik mynta u bnai ki la tuh ïa uwei u loket ksiar, kawei ka sati bad ka pisa T. 5,000 na ka iingsah jong u Bah Precioustone Khongthaw ha ka shnong Pongtung, East Khasi Hills District.
Arngut ki briew ki la mynsaw malu mala hadien ba la mih ka jingïakynroi hapdeng ki katto katne ngut ki briew ha ka 7 tarik mynta u bnai ha ka por kumba 7:00 baje janmiet ha Rilbong Labour Camp, Shillong.
Kine ki dei ki jingjia ba la pynmih ha ka website jong ka tnat Pulit.
