Shillong, Naiwieng 16: Ka ïing ka sem jong u Bah Cheristerfield Thangkhiew ha ryngkat ki nongïalam Ka Sur Ka Bri U Hynñiewtrep (KSKBUH) ki la shah pynshad shrieh ha ki pulit halor ka ejahar ba ka ïing ka sem ka la ujor pyrshah ïa ki pulit kiba donkti ban siat siat ïap ïa u Bah Cheristerfield ha ka ïingsah jong u ha Mawlai Kynton masar ha ka 13 tarik Nailar jong u snem ba la dep.
Ha ka sngi Balang ki nongïalam ka KSKBUH ki la leit ban ïakynduh ïa u Superintendent of Police (SP) East Khasi Hills u Bah Sylvester Nongtnger ban buddien halor ka jingtohkit na ka ejahar ba ki la ujor pyrshah ïa ki pulit hynrei na ka liang u SP u la ïathuh ba kane ka case kam dei shuh hapoh ka jingpeit jingkhmih jong u hynrei ha ka sorkar.
Haba kren bad ki lad pathai khubor u nongïalam ka KSKBUH u Bah Donboklang Kharlyngdoh u la ong ba kane ka jingpynshad shrieh jong ka sorkar bad ka tnat pulit ïa ka ïing ka sem ka lah ban dei namar ka buhrieh bad ba ka lah ban don kaei kaei sha lyndet.
Habab ïadei bad ka jingbym lah shuh ka sorkar ban sei ïa ka kyrteng ki pulit kiba siat ïap bad ka jingthmu jong ka ban khot pan jingpynshai na ki pulit ka Tactical Team 1 u Bah Donboklang u la buh jingkylli balei ka sorkar ka dang ai lad ïa ki ba kin ai jingpynshai wat haien ba ka kynhuntohkit laitluid ka la lap ïa ki pulit ba siat ïap ïa u Bah Che.
“Balei ïa kine ki pulit ka sorkar ka ai lad ban ai jingpynshai ki pulit kiba la tip shai ba ki siat ïap katba lada don ki samla kiba ka shu suba pat ka kem beit shimiet shimiet ruh,” u la buh jingkylli.
U Bah Donbok u la ong ruh ba kane ka jingleh ka sorkar ka pyni shai ba ka kwah ban ïada ïa ki pulit ba siat ïap namar ha ka por ba ym pat ïoh pdiang ïa ka kynhun tohkit u Myntri Rangbah u la ong ba ka sorkar kan sa shim ki rai jingpynshitom tad ynda la ïoh ka kaiphot na ka kynhun tohkit hynrei ynda ka sorkar ka la ïoh ïa ka kaiphot ruh ka ai daw pat ba kan sa shim jingpynshitom tad ynda ka la dep khot jingpynshai na ki Pulit.
U la maham ruh ïa ka sorkar ba dei ban pynkloi noh halor kane ka kam lym kumta ka kynhun kan sa shim pat da kiwei ki synjam bad ka la wer ruh ïa ki khun ka bri u Hynñiewtrep ba lada kata ka por kan wan ki dei ban ïa mih ryngkat ban ïakhih ban pynïoh ïa ka hok na bynta u Bah Che.
U la ong ruh ba u paidbah un sa bishar bad u lah ruh ban ai rai pynrem ruh ïa ka ha ka ilekshon ban wan halor ki kam kiba ka la leh.
Lah ban kdew ba na ka liang jong kiba haïing ryngkat ki nongïalam KSKBUH ki la leit mih ha kiba bun ki Police Station ban buddien ïa kane ka kam ba kynthup naduh na Mawlai Police Station hynrei na Mawlai PS ki bthah ba kin leit kynduh ïa u heh pulit ha Sadar Police Station bad ynda ki la leit ha Sadar la bthah biang ba kin leit sha Mawlai Police Station bad ynda ki la leit ha Mawlai PS la bthah biang pat ba ba kin leit mih sha Police Reserve bad ynda ki la leit sha Police Reserve pat la bthah biang ba kin leit mih sha ophis u SP bad ha kane ka kynti pat ynda ki la leit ban kynduh ïa u SP u ïathuh ba kane ka kam la peit hi beit da ka sorkar ym shuh da ka ophis jong u.
