Shillong, Jylliew, 26: Hynriew ngut ki samla kiba la wanrah burom ïa ka jylla Meghalaya da kaba ïoh khur takma ha ka National Taek-wondo Championship 2022 kaba la long ha Amritsar, Punjab dang shen ki la shah pynkup burom ha ka kynhun ba la ïalam da u Bah Michael Kharsyntiew ha ka jingïalang kaba la long ha Pine Wood Hotel Shillong ha ka sngi Thohdieng jong ka taiew baladep.
Ïa kane ka rynsan ïalehkai la pynlong da ka Taekwondo Taekwondo Indian Federation (TIF) naduh ka 17 tarik haduh ka 20 tarik mynta u bnai.
Ki hynriew ngut ki samla kiba la shah pyntbit ha ka Meghalaya Taekwondo Training Academy hapoh ka jingïalam jong u Bikash Baruah kum u Coah bad u Roshan Sharma kum u Manager ki kynthup ïa ka samla Sangeeta Rabha, u Wansalan Dkhar bad u Varinder Singh kiba la ïoh khur ïa ka takma ksiar, katba u Ujal Baruah, ka Lanosha Marbaniang bad u Sunny Kumar Shah ki la ïoh khur ïa ka takma rupa.
Ïa kine ki hynriew ngut ki samla bad kynthup ruh ïa u Coach bad u Manager u Bah Michael Kharsyn-tiew u la pynkup burom da kaba ai sngewbha da ka song pisa.
