Shah pynkup burom ki nongïalehkai Sports ka jylla ha ka sngi rakhe ïa ka National Sports Day

Shillong, Nailar 29: Ka Department of Sports & Youth Affairs hynne ka sngi ka la ïoh ban rakhe ïa ka National Sports Day lyngba ka program kaba la pynlong ha Tennis Court, J. N. Stadium Complex, Polo Ground, Shillong. Kane ka prokram ka long ruh ka jingpynkut noh ïa ka shi taïew ba la pynbna da ka sorkar jylla kum ka taïew lehkai Sports bad kilanmet kum shi bynta ban kynmaw ïa ka lyngkhuh sngikha jong u nongïalehkai Hockey ba paw jong ka ri India, u Major Dhyan Chand.
Ha kane ka sngi, la ïa don ryngkatlang u Myntri ka Sports & Youth Affairs, u Bah Shakliar Warjri kum u Kongsan.
Haba ai jingkren ha kane ka prokram, u Bah Shakliar Warjri u la pynpaw ïa ka jingsngewnguh ïa ki Deputy Commissioners jong baroh ki 12 districts ïa ka jingsnohktilang jong ban pynlong ïa ki jingïalehkai bapher bapher kumba shi taïew shuwa kane ka sngi kaba la pynlong ïa ka jingrakhe ka jylla ïa ka National Sports Day kaba seisoh.
Na ka liang jong u ne u Myntri ka tnat Sports ka jylla u la kyntu bad ai mynsiem ïa ki nongïalehkai Sports ka jylla ba kin nang trei shitom shuh shuh ban pynjanai ïa ka sap ka jong ki, ym ban ïalehkai tang ban pynbyrñia hynrei ban shim ïa kane kum ka lynti ban pynsan bad ban kiew irat.
Shuh shuh, u la bynrap ba na ka liang jong ka sorkar ka long ba la kloi ban kner ïa ki jingïarap khnang ban nang kyntiew ïa ki nongïalehkai Sports kiba lah ban mihkhmat ïa ka jylla ha ka national bad ruh ha ka international level bad ruh ban don ka jingïadei kaba skhem bad ki synjuk lehkai ka jylla khnang ban kyntiew kham shalor ïa ka Sports, khnang ba ka jylla kan ïoh ban sei ïa ki nongïalehkai Sports napoh ka jylla ban mihkhmat ïa ka ri ha ka Olympic Games 2032 .
Ha kane ka sngi la ïoh ruh ban plie ïa ka Megha fit programme; ka program ba ka sorkar ka la wanrah ban kyntiew ïa ka sport.
La ïoh ruh ban pynkup burom da ka cash awards sha ki nongïalehkai sports kiba la wanrah nam sha ka jylla bad ruh ïa ka ri, kiba mihkhmat ha ka Olympic bad ruh ka Non Olympic Sports Discipline. Kine ki kynthup i wei i nongïalehkai bad coach na ka Meghalaya Archery Association, 18 ngut ki nongïalehkai bad 3 ngut ki coach na ka Meghalaya Boxing Association, 18 ngut ki nongïalehkai bad 2 ki coach na ka Meghalaya Football Association, 84 ngut bad 3 ngut ki coach na ka All Meghalaya Karate-Do Association, 10 ngut ki nongïalehkai bad 3 ki coach na ka Meghalaya Judo Association bad 4 ngut ki nongïalehkai bad 1 coach na ka Meghalaya Sports Climbing and Mountaineering Association.
Ki nongïalehkai Sports ha ka Non Olympic Sports Discipline; ki long 4 ngut ki nongïalehkai bad 1 coach na ka Meghalaya Wushu Association, 7 ngut nongïalehkai bad 1 coach na ka Meghalaya Arm Wrestling Association, 37 nongïalehkai bad 5 ngut ki coach na ka Muay Thai Association of Meghalaya bad 30 ngut ki nongïalehkai bad 2 ngut ki coach na ka Meghalaya Jeet Kune-Do Association.
Haba phai pat sha ka Exhibition Football Match hapdeng ka Officers FC pyrshah ïa ka MLA FC kaba la pynlong ha MFA Turf, Polo Ground, Shillong, ka la jam sha kaba kut ha kaba ka Officers FC ka la pynjemkhnap ïa ka MLA FC da 5-0 kol.