Jowai, Naitung 14: Hapdeng ka iphuh iphieng ka kynhoi ka risa ka shad ka kmen ki paidbah hynne ka sngi, ka sngi ba pynkut ïa ka lehñiam bad ka rong Behdeiñkhlam ha Pung Aitnar, wan ka khubor ba sngewsih ha kaba ka Kali kaba synran (Escort) ïa ka Cabinet Minister ka kong Mazel Ampareen Lyngdoh ha ka jaka kaba la bthah ban pynïeng da ki Nongpynïaid ka Seiñraij Jowai kala shah pynjulor ha uwei u briew (ïa uba ym pat kwah ban pynpaw kyrteng) na ka kynhun kaba wan na Umshangyiar sha Pung Aitnar.
La ong ba kane ka Kali kaba escort ïa ka Dr. Mazel Ampareen Lyngdoh ka la julor shibun ha kaba la pait ka Wind shield (ka ïit kaba shakhmat), la tied la kyrdem ïa ka Bonnet bad la pyrshang wat ban ktahkti ïa ki Security Personnel kiba don hapoh kane ka Kali. Ki Pulit Escort (Security Guards) kiba don ha kane ka kali ki la kynrup bad kem shisyndon ïa une u Nongpynjulor.
Ka Dr. Mazel Ampareen Lyngdoh ka la wan sha Jowai ban ïa sakhilang ïa kane ka sngi pynkut ïa ka Lehñiam bad ka rongnohrot Behdeiñkhlam ka Seiñraij Jowai ha Pung ka Syiem Aitnar bad ka jingkynthoh na kiba bun ki ong ba kane ka jinglehdusmon ïa ka Kali kaba escort ïaka, ka thew ïa ka Dr. Ampareen hi. Haduh ba thoh ïa kane ka Khubor u Nongpynjulor ïa kane ka Kali kaba escort ula don ha kti ki Pulit bad ka jingtohkit ïa u ka dangïaid.
