Shillong, Rymphang 12: Ha kawei ka jingjia kaba sngewtriem , uwei u samla ha ka shnong Nongthymmai, Eastern West Khasi Hills ula shah pyniap ha la u jong ki Kni bad lai ngut kiwei pat.
Kane ka jingjia ha ka shnong Nongthymmai kaba don ha Eastern West Khasi Hills district bad la kynnoh ba ki riew thrang snam kila daiñ ïa ka met u samla hashuwa ban bret ha kawei ka wah kaba don hajan katei ka jaka.
Halor kane ka jingjia ki pulit ka Mairang Police Station ki la kem ïa 3 ngut ki briew kynthup ïa u kni.
La ïathuh ba une samla udei uba la tip kyrteng u Kerang Sawkmie bad u la mih na ïing ha ka 6 tarik Rymphang ban leit trei ha kawei ka khlaw kaba don marjan hynrei u khlem wan phai iing shuh.
Ki bahaïing namar ka jingbym wanphai ïing shuh, ki la leit ban wad ïa u bad hadien ba kim shym la lap, ki la ujor da ejahar ha Mairang Police Station ha ka 9 tarik Rymphang.
Katkum ka jingïathuh kiba haïing hasem, ki pulit ki la kem ïa 4 ngut kiba suba donkti, kynthup ïa ki 2 ngut ki kni jong u samla.
Ha ka jingtohkit, la kynnoh ba uwei na ki nongshah kynnoh u la phla ïa katei ka kam, da kaba pynpaw ba la pyniap ia une u samla bad ki la daiñ ïa ka met hashuwa ban bret ha kawei ka thwei kaba don hapoh ka shnong Nongthymmai.
Ha ka 10 tarik Rymphang, ki pulit ki la hiar sha katei ka jaka ban pynlong ïa ka jingtohkit bad ban lum ïa ki sabut bad ka kynhun Forensic Crime Scene Unit ruh ka la leh ïa ki eksamin ha katei ka jaka.
Ki briew jong ka Search and Rescue Team (SRT) ki la pynlong ïa ka jingwad da kaba ngam shapoh ka thwei hynrei haduh mynta kim pat lap ïa ka met u samla ba shem lanot.Ka jingwad ka la bteng haduh mynta ka sngi ban lap ïa ka met iap jong u samla ba suba shah pyniap.
