Nongpoh, Jymmang 27: Uwei u nongtrei jaka pynmih lyer oxygen kaba la tip kum ka Byrnihat Oxygen Plant u la duh noh syndon ïala ka jingim hadien bala suba ruh ba u la shah pyniap ha katei ka jaka trei jong u.
Katkum ka khubor naki pulit la ïathuh ba utei u rangbah ba la shah pyniap la tip kyrteng kum u Ramprasad Neogi (50 snem) bad la ioh jingtip ruh ba utei u rangbah u la trei ha katei ka Oxygen Plant la kumba 20 snem hynrei dei haka miet jong ka 26 tarik ba utei u rangbah u la wan ban trei haka por 10 baje eiei mynmiet naka bynta ka duty miet bad rung ruh sha ka kamra ba don ka pump naka bynta ban thoh register, hynrei kaba sngew lyngngoh ka long ba u nongap pahara jong katei ka karkhana u la lap pynban ïaka met iap jong utei u rangbah haka por 11:30 eiei mynmiet u ba la shong halor shuki ryngkat ki dak mynsaw haka khlieh.
Naka liang ki pulit ka Byrnihat kila leit mar mar sha katei ka jaka naka bynta ban pynlong ïaka jingtohkit ba la suba ruh ba utei u rangbah u la shah pyniap bad naka liang ki pulit ki register case bad pynlong ka jingtohkit bad naka liang ki pulit kila rah ruh ïaki paralok ba ïatreilang ha katei ka miet naka bynta ban pynlong ka jingtohkit halor katei ka jingjia.
