Shah pyniap u Bailius Diengngan ha sem ba sah ha thaiñ Thangsko EJHD da kaba shah dung da ka tari
Khliehriat naiwieng 21: Ki khubor pulit na East Jaiñtia Hills District ki iathuh ba ha ka janmiet jong ka 18 tarik mynta u bnai naiwieng 2025 ki la ioh jingtip ba ka la don ka jingjia ïa pyniap briew ha ka thaiñ Thangsko, East Jaiñtia Hills District ha kaba u Bailius Diengngan, 47 snem kyrta uba na ka shnong Mawkyllon (Riangdo, West khasi Hills) u la shah pyniap dusmon da kaba shah dung da ka tari bad la suba ba u bah Abhraham Sten 60 snem kyrta uba na ka shnong Pamra, East Jaiñtia Hills District u la leh ïa kane ka kam.
Ki khubor pulit ki iathuh ba ki la lap ïa ka met jong u Bailius Diengngan ba ju khot sin ruh da Bahduh of Nongstoin ba thiah iap ha kawei ka sem ba ki ju sah kaba don ha ka thaiñ Thangsko.
Dei hadien ba la ioh jingtip ka kynhun jong ki pulit jong ka Umpleng OP ki la leit bad kerkut ïa ka jaka ba jia katei ka jingshah pyniap bad ki la ioh ruh ban bat bad rah noh ïa u Abhraham Sten sha khliehrait Police Station bad halor kane ka jingjia la ai jingtip ruh sha ka kynhun jong ka Crime Scene Unit (CSU) East Jaiñtia Hill ban lum ïa ki sakhi sabut. .
Ki pulit ki la lap ïa kawei ka notebook ba thoh ïa ki contact number na katei ka sem ba thiah iap u Bailius Diengngan bad kumta ki pulit ki la ioh ban phone sha kiba ha ïing ha sem katba ïa ki dur ki dar la phah sha u Additional SP Crime ban leh ïa kaba donkam katkum ka aiñ.
La ong ba hadien ba la tohkit la sngewthuh ba u bah Abharam Sten bad u Bailius Diengngan ba ju khot da u Bahduh, ki la ïa dih kyiad lang hapoh ka sem ba ki just sahi bad ki la poi sha ka jingia mai iania bad iashoh iadat, la kynnoh ba ha ka por ba ki dang ïa shoh ïa dat u Abraham Sten u la dung da ka tarik ïa u Bahduh haduh ban da mynsaw jur bad iap hashen, ïa u Abraham Sten uba suba ba u la pyniap ïa u bahduh la rah da ki pulit sha Khliehriat Civil Hospital ban leh ïa ka medical examination . Ha ka 19 tarik pat ki heh pulit jong ka CSU ki la poi ha Thangksoo bad lum ïa ki sakhi sabut bad song ruh ïa ka met kaba sah jong u ba shah pyniap bad leit buh ha ka jaka buh met iap ha Khliehriat Civil Hospital bad ïa ka post mortem la dep ban leh hynnin ka sngi ka 20 tarik naiwieng bad ïa ka met ba sah jong u Bailius Diengngan la aiti noh sha kiba ha ïing.
Na ka liang kiba ha ïing jong u Bailius Diengngan ki la ujor da ka ejahar ha Khliehriat police Station bad la register ïa ka ejahar hapoh ki kyndon aiñ u/s 103(1) BNS, ïa u bah Abraham Sten uba suba ba u la leh ïa ka kam runar la rah sha ïingbishar bad la ai por tang ar sngi ban tokit da ki pulit ha ka police custody.