Hyderabad, Nailur 13: Da ka jinglap ksai kaba khraw bha, ki pulit ka jylla Hyderabad ki la ïoh ban kem noh ïa ki 2 ngut ki briew ba la suba ba ki la pynïap ïa ka longkmie ba la 50 snem ka rta ha la ïing ha Cyberabad bad ki la lute ka ksiar ba palat lak tyngka. Ïa kine ki runar la lap ba ki don ha Jharkhand. Ka kynhun ba kyrpang jong ki pulit ki la rah tohkit ïa kine bad hadien ki la wanrah biang ïa ki ban tohkit shuh shuh, ong ki ophisar.
Kane ka jingpynïap kaba sngewtriem ka la jia 3 sngi mynshwa, ha kaba ka lanot ha kaba nyngkong ka la shah tied shwa da u pressure cooker bad hadien ki la ot ïa u ryndang da ka tari bad ka khanshi. Kine ba la suba ki la lute napoh ka ïing jong ka bad ki la sum ruh hapoh ka kamra sum ha shwa ba kin phet krad.
Ïa ka Renu Agarwal, ba la 50 snem ka rta, la shem ba ka la ïap da u tnga jong ka hapoh ka mala kaba 13 ka jaka sah kaba don ha IT hub Cyberabad. U Agarwal bad u khun jong ki, ki dang don ha ka kam kaba ki trei haba kane ka kam runar ka la jia.
Hadien ba ki la shem bad ka jingkhang ka la khang tala ki la rung hapoh ka flat lyngba ka balcony da ka jingïarap u nongshna pipe um bad shem ba ka Agarwal ka la ïap.
Na ka liang ki pulit ki la ong ba ki la lap ba ki kti ki kjat jong ka la teh bad hadien ka la shah tied pat da u pressure cooker. Kitei ki runar ki la ot ruh ïa u ryndang da ka tari bad ka khanshi kaba la pynlong ïa ka ban ïap. Kitei ki runar ki la ïoh ban phet krad da kaba ïoh ruh ban rong ei kumba 40 gram ka ksiar bad T. 1 lak ka pisa.
Ha shwa ba kin phet kitei ki runar ki la sum la sleh shwa hapoh ka ïing jong ka. Ki la kylliang ruh ïa ki jaiñ bad ki la iehnoh ïa ki tiar ba la khah snam hapoh ka jaka ba ki la pynïap ïa katei ka briew bad kiwei kiwei. Ïa ka met ka Agarwal la phah na ka bynta ban pyndep ïa ka jingkhmih bniah lyngba ka post-mortem.
