Bhopal, Jymmang 03: Arngut ki riewlum, kiba la shah kynnoh ba ki shoh doh masi, ki la shah shoh haduh ban da ïap ha Distrik Seoni jong ka jylla Madhya Pradesh.
Katkum ka jingïathuh ki Pulit, la ong ba kumba 20 ngut ki riewrunar ki la hiar thma sha kawei ka ïing ba don u Sampat Batti bad u Dhansa, ha kaba la kynnoh ba ki la pynïap ïa ka masi ban shoh doh. Kine ki runar ki la shoh la dat bad bom da ki dieng ïa kine arngut haduh ba kin da mynsaw jur. Hynrei ki la khlad noh sha shiteng lynti por ba pynkit ïa ki sha Hospital.
Uwei u para marjan uba mut leit ïarap ïa ki ruh u la shah shoh lang haduh ba un sa mynsaw jur.
Ki Pulit ki la kam ba la ïoh kurup ruh kumba 12 Kilo ka dohmasi na ka ïing kitei ki arngut. Ki Pulit ki la ïathuh ba la lem 6 ngut ki briew kiba suba donkti ha kane ka jingjia.
Na ka liang ka Congress ka la pynrem jur ïa kane ka jingjia bad dawa ban thung da ka jingtohkit kaba khlaiñ halor kane.
Ka Madhya Pradesh kadei ka jylla ba la synshar da ka Seng BJP, hadien ba ka la pynkhyllem shiteng por ïa ka sorkar ba la ïalam da ka Seng Congress.
