Nongpoh, Natung, 11: Ban pyrshah jur halor ka jingïasoi ïa ka MoU hapdeng ka jylla Meghalaya bad ka Assam ha ka jingïapynbeit pud pynbeit sam kaba dei ha ka wat kaba nyngkong ba ka pung dohkha jong ka shnong Maikhuli la pynhap jubor sha ka jylla Assam, ki paidbah Nongshong shnong ka shnong Maikhuli mynta ka sngi ki la ïa mih paidbah ban ïaid paidbah na ka bynta ba pyrshah jur halor katei ka MoU ba la ïa soi haduh ba la pynhap jubor ïa ka pung dohkha sha ka jylla Assam.
Da ka jingpyrshah jur, ki nongshong shnong ka Maikhuli naduh ki longkmie ki longkpa, ki samla bad ki nongïalam shnong ki la ïa mih paidbah ban rah ïa ki banner, ki placard bad ki jingthoh ba bun rukom kiba pynrem halor kane ka jingpynhap jubor ïa ka pung dohkha sha Assam bad ki la dawa ruh na ka sorkar Meghalaya ba ka dei ban pynphai biang ïa katei ka pung dohkha sha ka Shnong Maikhuli ba hap ha Ri Bhoi District ha ka jylla Meghalaya.
Kumba la pynpaw, kane ka pung dohkha ka dei ka pung dohkha ba la long trai da ka shnong Maikhuli bad ki la ri la sumar mynta la palat 50 snem ei ei bad kane ka pung dohkha ka dei ruh kawei na ki lad kamai ka shnong ban kyrshan ïa ka skul hapoh ka shnong bad ruh ïa kiba bun ki jingdonkam hapoh ka shnong ka thaw bad kaei kaba la pynbitar ïa ki paidbah ka dei ka jingïasoi ïa ka MoU ban pynhap jubor ïa katei ka pung sha ka jylla Assam khlem da tih ne bishar bniah halor ka jinglong trai ïa katei ka pung dohkha da ka shnong Maikhuli.
Ha kane ka jingïaid paidbah, ki nongshong shnong da ka sur kaba jam ki lad dawa jur na ak sorkar Meghalaya bad ka sorkar Assam ba kin pynkylla biang noh ïa ka MoU bad ban pynphai biang ïa katei ka Pung Dohkha sha ka Shnong Maikhuli, ha kaba ki la pynapaw ruh ba horkit hordang kin nym ailad ba katei ka pung dohkha ba la ri la sumar da ka shnong kan leit sha ka jylla Assam.
Haba kren sha ki nongthoh khubor, u Rangbah Shnong ka Shnong Maikhuli u Nicholas Marak bad u Rangbah shnong barim u Heniton Marak, ki la pynapaw ba ka shnong bad ki paidbah nongshong shnong hi baroh kawei ki da sngewsih jur ba la pynhap jubor ïa katei ka pung dohkha sha Assam ha ka jingïasoi ïa ka MoU ha ka kam pynbeit pud pynbeit sam ka Meghalaya bad ka Asssa. Kane ka jingïasoi ïa ka MoU ka dei kaba la shu ïa soi jubor khlem da tih bniah ne wad bniah ha kaba katei ka pung dohkha ka dei ka nongkynti jong ka shnong Maikhuli kaba kyrshan ïa ka skul bad ruh ïa ki kam shnong ki kam thaw da kaba ki ri ia ki dohkha, ki la ong.
Ki la ong ruh naduh ba sdang ki la dep ban ïa pyrshah ïa katei ka kam ban aiti ïa katei ka pung dohkhas sha ka Assam ha ka jingïasoi ïa ka MoU bad nalor kata ki la dep ruh ban phah na ka por sha ka por lyngba ka dorkhas sha u Myntri Rangbah ka jylla, u Conrad K. Sangma bad sha ka sorkar jylla hi baroh kawei ba kin ïa kren ïa kane ka kam bad kumba long haduh mynta kim shym la ïoh kano kano ka jubab ba ka sorkar kan ïa kren tang na ka bynta kane ka pung dohkha.
Shuh shuh, ki la ïathuh ruh kum ka shnong bad ki paidbah nongshong shnong ki la rai ban ieng pyrshah ba da lei lei kin nym ailad ba katei ka pung dohkha kan leit sha ka jylla Assam bad ki la buhr uh ka jingkyrpad kaba jur ïa ka sorkar jylla ba kin tuklar lem bad ka Assam na ka bynta ban pynphai kylla ïa katei ka pung dohkha bad lada ka sorkar kam shim khia kum ka shnong bad ki paidbah nongshong shnong kim banse ban ïaid da kano kano ka lynti ban ïoh ïa ka hok long trai halor katei ka pung dohkha, ki la bynrap.
