Khliehriat nailur 30 : Ka Jaiñtia Students Union, hadien ba ka la lap ba u Ayush Kumar ba u lah pyndonkam da ka PRC kaba u la shu ioh da ka lynti bym dei na u Deputy Commissioner ka East Jaiñtia Hills District ha u snem 2021 da ka ba u la apply lyngba ka Temporary Residential Certificate na ka shnong Thangskai kaba u la ioh ruh ïa ka PRC ha ka juh u snem bad u la leit ban aplai ïa state quota lane ka bhah jong ki nong Meghalaya ban pule ïa ka MBBS 2023-24.
Halor kane na liang ka JSU ka la iai bud dien ïa ka jingleh sukor jong u Ayush bad mar mar ka seng lem bad ki nongïalam shnong jong ka shnong Thangskai ki la dawa na ka sorkar ban pyndam noh ïa ka kyrteng jong u ban leit pule MBBS bad kane ka jingdawa mynta ka la urlong.
Ka seng dang shen ka la leit ban ïa kynduh ia ka myntri jong ka tnat ka koit ka khiah, ka Dr Ampareen Lyngdoh bad buh ruh da ka jingthoh ha u bah Cyril V Diengdoh, IAS, uba dei peit ïa ka tnat Home and Political jong ka sorkar jylla bad ka seng ka buh ruh daka shithi ujor sha u Deputy Commissioner ban pynshisha ba u Ayush Kumar um dei hok ban ioh ïa ka state quota lane ka bha leit pule na Meghalaya ban pule MBBS, namar u dei u bar jylla bad u kpa jong u don Aadhaar sha Bihar bad ka EPIC ruh ki don sha Bihar.
U kpa jong utei u Ayush lem bad ka ïing ka sem ki dei kiba shu sah trei ha company Dalmia Cement Thangskai bad ka seng ka tip shai ba une u briew um don hok ban ioh ïa ka PRC namar um dei u nong shong shnong ba pura jong ka jylla Meghalaya.
Na ka liang ka seng ka pynpaw ïa ka jingsngewnguh ia shnong Thangskai, East Jaiñtia Hills District kaba la pdiang ïa ka jingbakla da kaba buh da ka shithi ujor pyrshah ïa u Ayush bad ïa u Kpa jong u ha u Deputy Commissioner ka East Jaiñtia Hills bad kane ka jingdawa ka seng mynta ka long kaba jop.
Ha kajuh ka por ka seng ka phah ruh ïa u kyrwoh khubor sha baroh ki nongïalam shnong jong ka Bri u Hynñiewtrep ba nangne shakhmat kim dei satia ban ai syrnot shnong lane NOC ïa ki bar jylla namar ka jingioh ïa ki syrnot bad ki NOC kan ktah bad kan wanrah ïa ka jing shah ïuhroit ïa ka hok long trai jong ki trai ri trai muluk.
