Shah pyndam u number plate sorkar, law ïa ki siren, shah tar ki ïit ïong ha Ri-Bhoi

Nongpoh, Nohprah 22 : Ki pulit ka Ri-Bhoi da kaba tyngeh kila maham ïaki paidbah kiba ju ñiah kali ha surok bah ba kim dei ban pynkheiñ aiñ namar ki pulit kim don shuti khristmas ne snem thymmai hynrei kin mih sha surok ban pynthikna ba ki paidbah kin shngaiñ haka leit ka wan bad ban nym don kino kino kiba pynkheiñ aiñ bad kane ka jingtalasi kan bteng haduh snem thymmai.
Na ka liang ki pulit ka Ri-Bhoi mynta ka sngi kila hiar biang sha surok haka shnong Quinine hapoh ka jingïalam u Senior Superintendent of Police u VS Rathore haka jingdonlang u Bah O Massar Additional SP lem bad ki pulit ophisar ka Nongpoh bad Umsning Police Stationban talasi naphang ïaki kali paidbah namar ki pulit kim kwah ban mih kano kano ka jingjia ba sngewsih tang naka jingleh khlem akor bad pynkheiñ aiñ da ki katto katne.
Ha kane ka jingtalasi jong ki pulit khlem jingmap naduh ki kali paidbah, ki kali sorkar kila talasi naphang bad hapdeng ka jingtalasi kila lap ruh 2 tylli ki kali kit pisa jong ki bank kiba pyndait siren khlem kano kano ka jingioh jingbit bad naka liang u SSP u la phah weng mardor, shuh shuh kawei ka kali kaba thoh Government of Meghalaya ha u number plate kala shah khoh bad shah pyndam namar ym don briew sorkar kiba dei ban shong ha katei ka kali ryngkat ka jingmaham ruh ba kim dei ban pyndonkam bakla ïa kum kine ki jingthoh.
Na ka liang ki pulit kila law naphang ruh ïaki kali tah iit iong, bad daiñ kuna ruh ïa bun ki kali pynkheiñ aiñ.
Lah ruh ban kdew hangne naduh ka jingmaham ki pulit bad ka jingmih surok khari khari da ka jingïalam hi u SSP, ki jingjia aksiden ha Ri-Bhoi kila duna bha bad hiar arsut lait noh tang ki jingjia ba malu mala bad bun naki paidbah kila ai ka jingïaroh halor kane ka sienjam bala shim da ki pulit ban pynthikna ba ki paidbah ba leit ba wan ha surok bah kin nym kylla langkñia haki riew pynkheiñ aiñ.