Shah pom pyrthat 4 ngut ha Miangshang mynsaw jur 3 ngut

Nongstoiñ, Jylliew, 16: Lai ngut ki briew ki la mynsaw jur ha ka jingpom u pyrthat hynne ka step ha ka shnong Miangshang jong ka thaiñ Maweit. Katkum ki tyllong la ong ba kane ka jingjia ka la jia ha ka por 9:30 ei ei, ha kaba u pyrthat u la pom nyngkong ïa ka samla Pynbianglin Ryntong ka khynnah skul ba shong klas 6 ha Deising Social Welfare School Nongsba. La ong ba kane ka jingjia ka la jia ha ka por ba ka dang khlieng tiar ha ïing sah jong ka ha ryngkat ka jingdonlang kiba haïing.
La ong ba mar ïa jia katei ka jingjia, kiba haïing mar mar ki la pyntip sha CHC Maweit bad pynïoh Ambulance ban pynkit ïa ka sha jaka sumar. La ong ba katba ki dang ïa ap ïa ka Ambulance, sa shisien biang u pyrthat u la pom biang ha phyllaw katei ka jaka. Ha kane ka jingjia sa lai ngut ki briew kiba don ha katei ka jaka ba kynthup ïa u
Raphael Thyrniang u ba dei pasan jong ka khynnah, Albert Kharjahrin ba dei parit bad u Hector Marshiangbai pakha jong ka khynnah, ki la kyllon ha madan khlem tip briew shuh.
La ong ba ki para nongshong shnong kiba la poi paidbah ha katei ka jaka, mar mar ki la ïarap katba lah ban pynkit sha ki Ambulance ban pynpoi ha Nongstoiñ. Hynrei, mar ïa poi ha Nongstoiñ Civil Hospital, mar mar ki Doctor ki la phah pynkit noh ïa ka samla Pynbianglin bad bah Raphael bad ki la don mynta ha Hospital ha NEIGHRIMS. Katba ïa u bah Hector dang shu pynkit ha ki por kumba 9 baje ei ei mynta ka miet sha Shillong namar u la mynsaw jur. Kumba long mynta u ba dang sah ha Nongstoiñ Hospital u dei u Albert Kharjahrin.
Haba ïakren bad uwei na kiba haïing jong kine kiba jia kane ka jingjia, kata u Bah Kyrshanlang Nongsiang, u la ong ba ka long ka jingjia kaba kyndit bad sngewsih haduh katta. U la ong ruh ba lehse lada don mano mano ba kloi ban ïarap la ka long mano mano ruh, na ka liang kiba haïing ki da sngewnguh eh, namar ki dei na ka longïing ba duk. Kumba long mynta ki la shu ïoh jingïarap tang na ki bor Hospital bad Ambulance.
Na ka liang ka UHM West Khasi Hills District bad na ka liang ka WKSU sengkmie, lyngba u samla Moon Nongrem bad samla D.Sun, ki la pynpaw ïa ka jingsngewkhia halor kane ka jingjia. Ki la phah ruh ïa u kyrwoh kitbok ba kiba ngat ha kane ka jingjia ba kin ïoh noh ïa ki met kiba koit ba khiah bad ai mynsiem ruh sha kiba haïing hasem.
Ha ka juh ka por ki la kyntu sha baroh kiba don ka mynsiem sngew lem ban ïarap ïa kiba kum kine kiba ngat ha kum kane ka jingjia ba sngewsih, ba kin sngewbha ban kner lem ka kti kamon kti kadiang bad ban ïarap lem ïa ki para ri kiba ïakynduh ïa ki jingjia ba sngewsih.