Shillong, Nailur, 16: Ki nonghikai skul kontrak kiba don hapoh ka lama jong ka Meghalaya Lower Primary School Contractual Teacher’s Association (MLPSCTA) kiba la thmu ban pynlong da ka jingïaid paidbah kaba jaijai ha ka sngi Thohdieng nakhmat u dur mot jong u Kiang Nongbah uba don hajan ka Shillong Civil Hospital ki la shah pakhang lynti ha ki Magistrate bad ki bor Pulit.
Kane ka jingthmu jong kine ki nonghikai skul kontrak ban pynlong da ka jingïaid paidbah kaba jaijai ka long kum shi bynta ban dawa ïa ka Sorkar Jylla ba ka dei ban thungkam biang ïa ki nonghikai skul Kontrak kiba la sha wengkam naduh u bnai Kyllayngkot, 2021.
Shiphang ka la mih ka jingïapyni nia kaba jur hapdeng ki Magistrate bad ki nongïalam jong ka Association ki bym ailad hi ruh tdot ïa ki nonghikai skul kontrak ban khih nakhmat u durmot jong u Kiang Nangbah.
Namar ka jingbym ailad jong ki Magistrate ki nonghikai skul kontrak kiba don da ki phew ngut ki la shu pynlong tang da ka jingrah placad ryngkat ka jingpyrta pyrshah ïa ka jingshah leh beiñ ha ka Sorkar Jylla.
Khnang ba pynkhlaiñ shuh shuh ïa ka jingïakhih, u President ka Association u Bah Birbor Riangtem u la pynbna ba ki nonghikai skul kontrak kiba la shah weng kam kin sa pynlong ïa ki jingïakhih ha ki district bapher bapher jong ka jylla.
Ha kane ka sngi, la synran lang ïa kine ki nonghikai da ki nongïalam jong ki sengbhalang kiba kynthup ïa ka HYC, ka HNYM, ka AIM bad kiwei kiwei.
