Shah pakhang lynti ki dkhot ka HITO ha Byrnihat ba thmu leit sha Khanapara, thang ïaka tyngshop jong ki myntri ka sorkar MDA

Nongpoh Nailur 22: Da ki spah ngut ki dkhot bad ki nongïalam Jong ka seng HITO kiba iaid rally naduh Umiam bad thmu ban pynkut shaduh Khanapara mynta ka sngi kila shah bat noh haki bor pulit bad majistor jong ka Ri Bhoi ha Byrnihat hadien ba ki thmu ban hiar sha ka thaiñ Khanapara bad kumjuh sha ophis u Syiem ka Raid Marwet ban leit pyrshah ïaka jingwanrah ïaka ktem Casino ha Ri Bhoi.
Ha katei ka jinghiar jong ki seng HITO la sakhi ruh ba ki bor pahara naduh ki pulit Ri-Bhoi, CRPF kila syrtap ha katei ka thaiñ ban peit pyrman ïaka jinglong jingman bad khamtam kaba ktah ïaka shongsuk shongsaiñ.
Katei ka jingshah bat ki dkhot ka HITO ha Byrnihat kala pynlong ïakitei ki dkhot bad ki nongïalam ban shong beit ha surok ba kim treh ban khih na katei ka jaka kaba la wanrah ruh ka jingdheng Kali kaba jur shipor bad hadien ka jingiañia bad ki bor district bad bor pulit kila ailad noh ban phai tang na 14 mer ban pynlong pat ïaka jingïalang ba lyngkot ha Byrnihat ha kaba kila pynlong ruh ka jingthang tyngshop ïa baroh ki Myntri jong ka sorkar MDA naduh u Conrad Sangma Myntri Rangbah, bad ka Sur ba Sawa jam ha katei ka sngi ka long ba ka kyntien Casino kam dei shuh ban dang mih nangne shakhmat bad kum ki dkhot kila long kiba pynkhreh ban rah mar uwei u tyrnem ban leit pynpra lada ka sorkar ka dang pynmih biang ïaka kyntien Casino ban pyntreikam haka jylla.
Haba kren ha katei ka sngi u Bah Donbok Dkhar, President ka HITO u la kynthoh jur ïa ka sorkar MDA khamtam ïa u Conrad K Sangma, u Bah Prestone Tynsong bad u James Sangma lem bad kiwei kiwei ki myntri ka sorkar MDA kiba long kum ki myndie ri kiba thmu ban pynjot ïaka ri Khasi bad Jaiñtia da kaba wanrah ïa kata ka ktem khalai kaba kum ki paidbah ka jylla kim lah ban pdiang.
U la phla ruh, ba hadien ba ka HITO ka la mih ban pyrshah ïa ka Casino na ka liang ka sorkar ka la phah briew sop sop ban pyrshang pynthame ïa ki nongialam da kaba kular ban aikam aijam, bad haba kylli pat ïa ki kam baheh pat yn ai sha u dkhar kumta na ka liang ka seng ka la kyntait ïa kane ka jingpyrshang pynthame wat ka jingtyrwa da ka pisa namar ba kum ka seng kaba ieng ha ka nongrim da leilei kan nym ïa peiñ ban die ïa la ka ri bad ka jaidbynriew bad kim kwah ba ka ri Khasi kan long kum ka Sodom bad Gomora kaba u Blei un thang da ka ding.
“Ki nongïalam ka sorkar MDA kim dei shuh tang kita kiba jrong kti hynrei ki dei kita ki nong leh beijot ïa ka Bri u Hynniewtrep, bad lada ki kwah ba kata ka Casino kan treikam balei kim leit rah sha Garo Hills, balei ki leh shilliang beit ïa ka Ri Khasi, haka jaka ban wanrah ïa kita ki skul pule ba bei da ka sorkar, ki medical college bad kiwei kiwei kiba long ka jingmyntoi bad ka jingkyrkhu ïaka sorkar”.
U la buh jingkylli ruh shaei jah ka 500 klur ka Basin, shaei la pynphai ïa ka 5000 klur ka jingbamsap lyngba u dewiong”, ong u Bah Dkhar da kaba bynrap ruh, ba ka jingkam jong ka sorkar ban kyntiew ïa ka khajna lyngba ka Casino namar ym don jingmih naei naei, haba ki la bam lut ïa ka spah ka phew jong ka Bri u Hynniewtrep te shaei kein yn don shuh kata ka ioh ka kot.
Namarkata u la ong ba kum ka seng kam salia wat lada dei ban ïa umsnam kin nym kynran dien wat haka jingring mynsiem khatduh kum ki dkhot ka seng kila pynkhreh ruh wat ka synduk metiap lada hap ban ïakhun da ka thma bad ka snam pyrshah ïaka sorkar.