Shah ot kilo ki marrep ba thung ha ri Khasi, kiba wan na ri thor pat kim shah ot kilo

Shillong, Nailar 01: Ka KHADC lyngba ka Executive Committee ba la ïalam da ka Voice of the People’s party (VPP) ka la leit ban jngoh ïa ki nongrep bad ki nongthied ïa ki marrep hapoh Ïew Dielang ha ka step Sngi Thohdieng hapoh ka jingïalam u CEM uba khmih ruh ïa ka tnat Ïew u Bah Shemborlang Rynjah, ki EM bad ki ophisar.
Ha kane ka jingleit twad jingmut ki la shem ba ka don shisha ka jingot kilo ïa ki marrep ba kynthup ïa u Soh saw, Kubi, Kajor bad kiwei ha kaba ki la lap ba la ïathuh da ki nongrep ba ki marrep kiba wan na ri thor kim ju shah ot kilo katba ki marrep ha ri Khasi pat ki shah ot kilo ha ki mahajon ha Ïewduh.
Haba kren sha ki lad pathai khubor u CEM u la ïathuh ba ka jingwan ha kane ka sngi ka long ban twad jingmut na ki nongrep bad nongthied namarba ka la don ka jingujor ka seng ki nongrep sha ka Sorkar jylla halor ka jingot kilo.
U la ong ba hadien ba la ïoh jingtip halor kane ka jingeh, u Bah Rynjah u la ong ba ka KHADC kan sa khot shen ka jingïalang bad ka seng ki nongrep bad ban shong ruh ka jingpyrkhat kam halor ki jingshem ha kane ka sngi.
Katba u EM Bah Powell Sohkhlet u la ïathuh ba ka jingïa ot kilo ka dei hapdeng ka jingïasngewthuh jingmut hapdeng ki nongdie bad nongthied bad kan long ruh kaba eh ban pynduh ïa ka jingot kilo, watba la don ka rai mynshwa jong ka EC barim ban khang noh ïa ka jing ot kilo ia ki marrep ha ïew dielang.
Ha kawei pat ka liang ki nongrep jhur hapoh ïew Dielang Ïewduh ki la pynpaw ïa ka jingsngewkhia kaba jur bha haba ki pynpoi ïa ki mar rep hapoh Ïew dielang Ïewduh namar ka jur palat ka jingshah ot kilo na ki mahajon ha basa jhur.
Ha ka jingleit twad jingmut ka EC VPP hapoh ka jingïalam u CEM uba khmih ruh ïa ka tnat Ïew u Bah Shemborlang Rynjah bad EM kine ki nongrep ki la pynpaw ïa ka jingeh na kane ka kam ot kilo bad ki la kyntu ruh ïa ka KHADC ban shim khia halong kane ka kam kaba ki la mad ka jingeh.
Watla ki la pynpaw ba ïa kane la leh da ka jingïasngewthuh jingmut lang hapdeng kiba die bad ba thied, hynrei ki la pynpaw pat ka jingdonkam ban ïatylli ba lada dang shah ot kilo ym dei ban die shuh ïa ki marrep sha ki mahajon.
Napdeng ki nongrep kiba mad bha ïa ka jingduh nong, haba kren sha ki lad pathai khubor ki la ong ba lada ki ïoh noh da kawei pat ka kam kin iehnoh ïa ka kamrep namarba ba la duhnong bad ïap ja palat, hynrei ki la ïathuh ba kim banse pat ban rep namar ym don da kawei pat ka kam ne ka lad ka lynti ban trei.
Ki la ïathuh ba hapdeng ki jingtrei shitom bad ba la seisoh ki kam, tang shu poi ha Ïewduh pat la shah ot kilo ki mar rep, katba u marrep ba wan na dkhar ne ri thor ym ju shah ot kilo.