Shillong, Risaw 08: Ki samla pule jong ka Lady Keane College ki ïathuh ba ki don ki shynrang kiba ïeng thad lad ha ka lynti ba noh na Keating Road ban poi sha ka kolej jong ki ba ki ju shah leh kynshleiñ ha kaba kine ki shynrang ki siaw bad khynñiat ruh ïa ki para shynrang ba kin poi tyngkhuh bad kine ki samla pule kynthei kiba ïaid lyngba.
Haba kren bad ki nongthoh khubor kine ki samla ki la ïathuh ba bunsien ka long kaba her syrngiew ban ïaid lynti na kane ka jaka namar bun sien ki shynrang ki wan dih kyiad bad kynja da ki bun bun ngut ha kane ka jaka wat mynsngi mynshai ruh kim don jinglehraiñ shuh.
Na ka liang ka HITO hadien ba ka la ïoh ia ka jingujor na ki nongbuh dukan bad ki paidbah halor ka jinglyngkar kane ka jaka ka la ai jingtip sha ki bor synshar district bad ha ka sngi Ba-ar na ka liang ka bor synshar District hapoh ka jingïalam Magistrate u Bah Ronnie Wahlang ryngkat ki dkhot ka HITO ki la leit ban jurip da lade ïa katei ka jaka.
Haba kren sha ki lad pathai khubor hadien ba la wan jurip ïa kane ka jaka, u President ka HITO u Bah Donbok Dkhar u la kyntu ïa ki bor khmih ba kin leh eiei ïa kane bad ban buh ki CCTV camera ba kan long ka jingshngaiñ ïa ki nongleit nongwan khamtam eh ïa ki samla pule.
“Ngi kwah ban kyntu ïa ka Shillong Contonment Board bad ïa ki bor district ba kin shim khia halor kane khnang ba kan wanrah biang ïa ka jingsngew shngaiñ ha ki samla pule ka kiba hap ïaid da kane ka lynti”, u la ong.
Shuh shuh u la maham ruh ba nangne shakhmat lada ka seng lada ka ïoh biang kum kane ka jingujor ba ki dang don kiba shong thadlad ha katei ka jaka lada dei u Khasi ne bar jylla kam map satia kan leh da kaba tyngeh.
Haba ïadei bad ka jingpynïeng ar shaka ki briew ha kane ka jaka na ka liang ka HITO ka la ai jingmut ba ym dei shuh ban shah pynïeng lait tang kiba wan pule ne kiba wan buh bad shaw skul na kane ka jaka pule.
