Shillong, Nailar 13: U para jong u (L) Bah Cheristerfield Thangkhiew u Bah Grannary S. Thangkhiew u la ong pynpaw ba u nongbishar ka Iingkashakri High Court uba la ong ba kane kan dei ka jingbishar kaba khatduh kaba yn sa tian bishar ha ka 19 tarik mynta u bnai bad u la ong ruh ba ka long kaba sngew lynngoh pat ka long ba kane ka kam jong u hynmen ka dang don ha ïingbishar katba ka sorkar pat ka la pyntieng pynban ïa u Pulit uba la dep ban phla hapoh ka Human Rights Commission bad uba la dep ban phla ruh ha u nongbishar uba la shongthait bad ka suloi A K 47 kaba u la pyndonkam, hynrei mynta utei u pulit uba dei mynshwa kum u Constable mynta u la long bad shah kyntiew kyrdan kum u SI.
U la pynpaw ruh ka jingsngew lyngngoh ba kumno ka sorkar ka la kyntiew kyrdan ïa une u pulit bad kane ka jingleh ka sorkar ka pynshlur ïa ki pulit ba kin long ki nongpynïap briew bad kane ka la paw shai kdar ba dei ma ka kaba la phah siat ïap ïa u hynmen jong u bad lada ba ka sorkar kam leh ha kano ka rukom ka kyntiew kyrdan ïa u.
“Kane ka jingleh ka sorkar ka la pynshlur shuh shuh ïa kito ki pulit kiba shu kwah kyntiew kyrdan jubor da ka lynti ka bym dei bad kin sa leh ïa ki kam bymman kiba har rukom da ka lynti ka bym dei satia bad kiba kwah ban pynduh jait ïa ki nongïalam jong ka jaitbynriew bad kumta kum ki nongïalam ka jaitbynriew ngi dei ban shim khia bad dei halor kane ka jingleh ka sorkar kaba la pynbor ïa nga ban kynnoh bad ban kren ïa kane ka bynta,” u la ong.
U kyrpad ïa ki paidbah ba naduh mynshwa kiba la pynpaw ban pynïoh ïa ka jingbishar kaba hok na ka bynta u Bah Che, satang tang kawei ka lad kaba dang don kata ba dei ban wanrah ïa ka sorkar kaba thymmai ha u 2028 bad dei tang kane ka lad kaba lah ban wanrah ïa ka jingbishar kaba hok. “Kane ka jingkren ka jong nga kam dei satia kaba nga kren politik hynrei kaba nga kren naduh mynsiem nabar u don uwei u heh ka sorkar MDA u ba la ong ban ïoh ka jingbishar kaba hok ïa u Bah Che kan dei satang lada ka wan ka sorkar kaba thymmai namar ha ka sorkar kaba rim yn ym lah ban khmih lynti lano lano ruh.
“Nga ngeit ba kane ka jingwan jong ngi ha une u lum jingtep manla u snem kan ym dei tang ka jingkynmaw hynrei kan sei ïa ki rangdajied bad ki rangkynsai jong ka jaibynriew,” u la ong.
Shuh shuh u la ïathuh ba ki don ar ngut ki Pulit Khasi kiba la byrngem lypa ban pynïap ïa u hynmen jong u hapoh ar taïew bad kane ka la jia shisha ba hapoh ar taïew ba u Bah Cherishterfield Thangkhiew u la shah siat ïap ha la ka jong ka ïing sah.
U Bah Granary u la ong ruh ba u ithuh bad tip kyrteng jong kitei ki ar ngut ki Pulit Khasi kiba byrngem ban pynïap ïa u Bah Che, kumta u la khot ba kin wan ban ïakren bad ka ïing ka sem ban ïathuh ïa ki daw ba ki byrngem ban pynïap ïa u Bah Che namar haduh mynta kum ka jing ka sem ka dang sah umdum.
Ha kajuh ka por u la kyntu ïa u nongsiat ïap ïa u Bah Che, ba un mih shakhmat ban ïathuh ïa ka jingshisha mano ba phah ban siat ïap ïa utei u nongïalam barim ka HNLC.
U Bah Granary u la ong ruh ba u tip thikna ba ym dei ki pulit bar jylla kiba siat ïap ïa u hynmen jong u hynrei dei hi Pulit Khasi.
