Shah kynthup ka M’laya haka Group D, ha u Naiwieng yn sdang ka Group Stage

SHILLONG, Risaw 03: Ka Hyderabad kan ïoh ban pynlong ïa ka wat ïakhun ba khadduh jong ka 78th National Football Championship na bynta ka Santosh Trophy ha ka sien ba nyngkong hadien 57 snem, katkum ka jingpynbna na ka All India Football Federation ha ka Sngi Balang. Lah ban kdew ba ka sien ba khadduh ba kane ka nongbah kaba la tip ruh da ka City of Pearls, ka la ïoh ban pynlong ïa kane ka lympung ka dei ha ka samoi lehkai 1966-67 ha ka por ba ka Railways ka la pynliem ïa ka Services ban rah ïa ka namlahduh.
Ka final round la buh por lypa ha ka taïew ba nyngkong jong u Nohprah. Ka Telangana ka la ïoh ïa ka bye ban rung sha ka final round kum ka seng nongpynïaid.
Ki nongjop jong ki 9 tylli ki Group bad ki kynhun ba poi final ha ka samoi ba ladep, ka Services bad ka Goa – kin ïalehkai ïa ka final round ha Hyderabad. Katba ki jingïalehkai group stage kin sdang naduh u Naiwieng.
Baroh ki jingïalehkai yn pynlong ha GMC Balayogi Stadium, kaba la pynlong ïa ka Intercontinental Cup 2024 ha u Nailur.
Mynta ka kynti, ka Meghalaya ka la ngat hapoh ka Group D na bynta ki jingïalehkai Group Stage, katkum ka thup ba la pynbna ha ka website jong ka All India Football Federation hynnin ka Sngi Balang.
Ha ka Group D ki kynhun ki kynthup ïa ka Meghalaya, Assam, Sikkim bad ka Tripura. Kiwei pat ki jylla ka thaiñ shatei lammihngi (Arunachal Pradesh, Manipur, Mizoram bad ka Nagaland) ki don hapoh ka Group E.
Lah ban kdew ba ka kynhun ïalehkai ka jylla Meghalaya kam shym la mad ïa ka lynti ïaid kaba seisoh ha ka samoi 2023-24, da kaba pyndep khlem jingjop bad wan kyrdan ba san na ki hynriew tylli ki kynhun ha ka Group A. Katba ha ka samoi lehkai 2022-23, ka jylla ka la poi shaduh ka final shuwa ban shah rem noh ha ka Karnataka.
Ka thup ki kynhun na bynta ka Santosh Trophy 2024-25:
Group A: Jammu & Kashmir, Ladakh, Himachal Pradesh, Punjab
Group B: Chandigarh, Uttarakhand, Haryana, Delhi
Group C: Uttar Pradesh, Jharkhand, Bengal, Bihar
Group D: Assam, Sikkim, Meghalaya, Tripura
Group E: Arunachal Pradesh, Nagaland, Manipur, Mizoram
Group F: Madhya Pradesh, Chhattisgarh, Odisha
Group G: Tamil Nadu, Andhra Pradesh, Karnataka, Andaman & Nicobar
Group H: Kerala, Pondicherry, Lakshadweep, Railways
Group I: Maharashtra, Gujarat, Dadra & Nagar Haveli and Daman & Diu, Rajasthan