Shah kynthup ka Lovlina, Nikhat ha ka kynhun ïalehkai boxing ban mihkhmat ïa ka ri sha ka CWG 2022

New Delhi, Jylliew 11: Ka Lovlina Borgohain kaba khur takma rnong ha ka Tokyo Olympics bad ka lahduh jong ka pyrthei ka Nikhat Zareen ki la shah kynthup lang ha ka kynhun ïakura ka India kiban sa mihkhmat sha ka Commonwealth Games 2022 hadien ba ki la jop ha ka jingpyrshang kaba khatduh ha ka sngi Saitjaiñ.
Ïa ki lai sngi ki jingpyrshang ba la pynlong ha Indira Gandhi Indoor Stadium, ka Nitu (48kg) bad Jaismine (60kg) kine ruh ki la rung lang sha ka kynhun ba saw ngut ki thei ïakura ka ri hadien ba ki la lah ban ïalehkai bha bad jop ha ki jingpyrshang ba khatduh na bynta ban jied ïa ki nongïalehkai sha katei ka lympung kaban sa long mynta u snem.
Ka Lovlina bad Nikhat ki la khur jingjop mar 7-0 ha la ki jong ki kyrdan ïakhun. Ka Lovlina ka la pynliem ïa ka Pooja ha ka kyrdan ïakhun ba 70kgm ka Nikhat ka la pynliem ïa ka Minakshi ha ka kyrdan ïakhun ba 50kg.
Ha ka jingïakhun kaba ïakhaid bha ha ka sngi sdang ha ka sngi Saitjaiñ, ka Nitu ka la lah ban wanphai da ka jingjop da kaba pynliem da 5-2 pyrshah ïa ka Manju Rani kaba khur takma rupa ha ka World Championships 2019. Watla ka la rem ha ka wat kaba nyngkong, ka Nitu ka la lah ban ïakhun tyngeh bad baroh arngut hi ki la lah ban ïakhun tyngeh bad ïoh ban kura mar kylliang.
Katba ka Jaismine ka la hap ban ïakhun ïa ka thei kaba khur takma rnong ha ka World Championships 2022 ka Parveen ha ka kyrdan ïakhun lightweight bad ka la lah ban pynliem da 6-1.
Katba ka jingpyrshang, ka Boxing Federation of India (BFI) ka la jied 12 ngut ki nongïakura jong ka kynhun ka ri ba kynthup phra ngut ki shynrang na bynta ka Commonwealth Games 2022 kaban sa long ha Birmingham, kaban sdang naduh ka 28 tarik Naitung haduh 8 tarik Nailar.
Kine ki kynthup ïa u Shiva Thapa (63.5kg), Amit Panghal (51kg), Mohammad Hussamuddin (57kg), Rohit Tokas (67kg), Sumit (75kg), Ashish Kumar (80kg), Sanjeet (92kg) bad Sagar (+92kg) kiba la ïoh rung sha ka kynhun ha ka liang ki shynrang.