Shillong, Nailur 21 : Uwei u nongtrei mon sngewbha na rilum Garo, u Cherian Momin u la kynthoh ïa kaNorth-Eastern Hill University Teachers’ Association (NEHUTA) da kaba ong ba ki pynwit ïa ka jingkiew arted jong ka Tura Campus jong ka North-Eastern Hill University (NEHU).
Ha ka kyrwoh khubor, u Cherian u la pynpaw ka jingsngewkhia halor kane ka ishu bad ong ba ki kam jong ka NEHUTA ki la ktah ïa ka jingkiew bad ka bit ka biang jong ka Tura Campus bad ki samla pule jong ka.
U Momin u la kynnoh ruh ba ka NEHUTA ka la shu pynmih ki jingkynnoh bym don nongrim kiba kylla long ka daw ba ktah pat ai ka jingkiew jong ka Tura Campus.
Shuh shuh u ong ruh ba ka jingkam jong ka NEHUTA ïa ka jyrsieh ba 94 klur ka dei ka bym don nongrim bad kaba khlem ki sakhi satar ban pynshisha.
La ïathuh ba ka campus ka la ïoh ïa ka jingmang pisa kaba 45 klur na ka Ministry of Tribal Affairs kum shibynta jong ka mang ba 94 klur ban pynbiang shuh shuh ïa ki jingdonkam jong ka campus. Hynrei la kynnoh pat ba ka don ka jingpynwit ha kaban pyntyllun ïa katei ka projek.
Nangta la kynnoh ruh ba katei ka kynhun ka khang ruh wat ïa ka jingïakynduh jong ka Executive Council kaba long kaba donkam na ka bynta ban shim rai bad ïoh ïa ka jingmynjur.
Ha kajuh ka por utei u nongtrei mon sngewbha u kyntu ïa u Vice-Chancellor ka NEHU, u Prof PS Shukla,ba un lum noh ïa ka Executive Council ban ïatai bad mynjur noh ïa kitei ki projek kam pynroi.
