Shah kyntait kiba duna dkhot met ban ïoh ïa ka PMAY-G, thoh ka KDA sha ka Sorkar
Kyrpad ban kyntiew ïa ka rta thungkam haduh 47 snem
Shillong, Lber, 23: Ka Khasi Disabilities Association (KDA) ha ka sngi Balang ka la phah da ka jingthoh sha u Myntri ka tnat Community & Rural Development Department, u Bah Hamletson Dohling ban pynsngew halor ka jingkyntait jong ki ophis Community & Rural Development Department bapher bapher ban ai ïa ka skhim Pradhan Mantri Awas Yojana-Gramin (PMAY-G) sha ki briew kiba duna dkhotmet watla ki nongaplai ki dei kiba hap hapoh u laiñ ka jingduk ne Below Poverty Line (BPL).
Ha ka dorkhas, ka Seng ka la ong, “la bun ki khep ha kaba ki nongaplai, ha ki ophis C&RD Block da ka jingïarap lang jong ka Association, ki la shah kyntait ban ïohpdiang ïa ka skhim (PMAY-G) watla ha ka jingshisha kine ki nongaplai ki dei kiba hap hapoh u laiñ jong ka jingduk.”
Haba kdew katkum ka aiñ ba la pynkupbor ïa ki briew kiba duna dkhotmet, ka Seng ka la ong, “katkum ka Rights of Persons with Disabilities Act, 2016 Chapter-VI Section 37 ka kdew, ba ka Sorkar bad ki bor synshar, da ka jingpynbna, ki dei ban ai ïa ki skhim sha ki briew kiba duna dkhotmet, san percent ka bhah ba la ai na ka bynta ka rep ka riang bad ban shna iing nalor kiwei pat ki song pynroi, da kaba buh hakhmat shwa ïa ki kynthei kiba duna dkhotmet. San percent ka bhah ban ïarap ïa ki longing kiba duk bad kiwei kiwei pat ki skhim da kaba buh shwa hakmat ïa ki kynthei kiba duna dkhotmet.”
“Katkum ki kyndon jong ka PMAY-G Chapter 3 Section 3.4 bad Sub-section 3.4.6 ka kdew haba shim ïa ka rai ban ai ïa ki song jingïarap sha ki nongïoh bhah kiba dei ban ïoh jingmyntoi, ki longing kiba don ïa kiba duna dkhotmet ki dei ban ïoh shwa ïa ka bynta kaba hakhmat,” la kdew ka Seng.
“Ngi kwah, namarkata, ban kyrpad ïa phi ban pynshai lem ïa ngi halor kane ka jingshah kyntait ïa ka hok jong ki nongaplai,” la kyrpad ïa ka Seng ïa u Myntri.
Ha kajuh ka por, ka Seng ka la phah ruh da ka jingthoh sha u Myntri Rangbah ka Jylla u Conrad K Sangma ba ka Sorkar kan pyrkhat lem ban kyntiew ïa ka rta thungkam ïa ki briew kiba duna dkhotmet na ka 42 snem sha ka 47 snem ka rta.