Shah kynnohlang VPP bad ka NPP halor ka jingbym ïoh scheme ki MDC ha KHADC bad JHADC

Shillong, Rymphang 15: Ka jingbym ïoh scheme ki MDC kiba dei ki dkhot ka Jaintia Hills Autonomous District Council bad na ka Khasi Hills Autonomous District Council mynta lah shi snem hadien ba kila jop ïa ka election kala mih ka jingshah kynthoh ïa ka jingbym lah ban trei kam jong ki Executive Committee kiba ïalam ïa ka Council.
Kum ban shu kdew kiba bun ki MDC kila pynpaw ïa ka jingbynniaw halor ka jingbym ïoh scheme mynta la shi snem tam hadien ba kila jop ïa ka election bad la pynpaw ruh ba kadei ka jingduh nong ba khraw ïa ki paidbah jong ka constituency hi baroh kawei.
Ha kaba ïadei bad ka Khasi Hills Autonomous District Council kaba la ïalam da ka Voice of the People Party (VPP) ïa ka Executive Committee (EC) ka jingshah kynnoh kala mih ba kadei namar ka jingbym nang ban trei kam kaba la pynlong ïa baroh ki MDC ba kin ym ïoh scheme mynta lah shi snem hadien ba kila bat ïa u lakam synshar.
Haba phai pat sha ka Jaintia Hills Autonomous District Council kaba la lam khamt da ka National People Party (NPP) ïa ka Executive Committee (EC) kane ka juh ka jingshah kynnoh kala mih ba kadei ka jingbym lah nang ban trei kam ka EC kaba la pynlong ïa ki MDC ban ym ïoh scheme.
Na ka liang u Mawphor ban ïoh jingtip halor kane ka jingkynnoh ba ym ïoh scheme ki MDC la ka long ha JHADC ne KHADC u la ïoh ban ïa kren bad katto katne ngut ki MDC kiba la kubur ruh ba ka scheme na ka Finance Commission naduh ba ki jop ha kane ka kynti ia ka election MDC kim shym pat la ïoh satia.
Haba ïa kren bad u Bah Andrew Shullai uba dei u nongïalam ka liang pyrshah ha JHADC u la ong, “Ki MDC schme mynta ngim shym la ioh bad ka daw ka lah ban long ba kam don ka jingïatrei lang kaba jan hapdeng ki Executive Committee bad ka tnad District Council Affairs (DCA)”.
“Kane ka jingbym ïoh scheme ki MDC kadei namar ka jingbym lah ban trei kam bha ki Executive Committee kiba ïalam ïa ka Council bad ka sorkar jylla ruh kumjuh” u la ong.
Shuh shuh u Ban Andrew u la ong, “Baroh ki dkhot ba thymmai kiba dang shu shah jied ha kane ka samoi kaba mynta kila dep ban buh ïa ka proposal hynrei wat tang kawei ka jingmang tynta ne ka work order ruh ngam pat ïohi satia”.
U Bah Andrew u la pynshai ruh ba ka scheme na ka 15th Finance Commission kam dei ha kine ki EC ba mynta hynrei kadei kaba la sdang naduh u snem 2020-21 bad kan kut haduh u snem 2025-26 bad kane lah sahteng naduh ki por ba mynshwa bad mynta ki dang ïaid ïa ka 2022 bad 2023.
Shuh shuh u Ban Andrew u la ong, “Halor ki scheme kim don jingtip eiei namar ba Executive Committee ba ialam ha JHADC kam ju khot jingialang ne kynthup lang ia ki dkhot ka liang pyrshah hynrei la shu leh marwei beit bad ngi shu sah ha ka umdum namar ba ki shu leh beit marwei hi”, u la ong bad bynrap ruh “Ka EC ha JHADC kam ju pyntip lang ia ka liang pyrshah”.
Na ka liang u MDC ka Laban Mawprem u Bah Ricky Shullai uba don ha ka liang pyrhshah ha KHADC u la ong, Ka EC ba lam khmat da ka VPP ruh kam ju pyntip ne consult ia ki para MDC hynrei la shu leh beit marwei bad u la kubur ruh ba mynta lah shi snem ki khlem pat ïoh scheme eiei bad kane kala pynlyngnoh ia ki.
Halor kane ka jingbym ïoh scheme ki MDC ka JHADC bad KHADC lyngba ka jingiakren la sngewthuh ba ha ka dorbar mang tyngka ka jingiakren kan khluid bha halor ka jingbym ioh scheme.
Haba ia kren bad ki MDC kiba la jop bunsien kila pynpaw ba, mynta ka dang ïaid beit ka scheme barim hynrei ka don ruh ka jingthut hangne hangtai namar ba kam don ka jingiatrei lang kaba jan hapdeng ka DCA bad ki EC bad ruh ka jingslem ban aiti ïa ka UC.