Shah ktah kti ki ar ngut ki samla, yn mudui ejahar ka shnong Mawkhyrwang

Mawkyrwat, ‘Naiwieng, 12: Ka Dorbar Shnong Mawkhyrwang ha ka sngi Baar ki la pynlong ka jingïalang ban ïatai sani halor ka jingshah ktah kti ki ar ngut ki samla jong ka shnong Mawkhyrwang ha Ïew Wahlapung, Jerlang, South West Khasi Hills District.
Ka jinglum ïa ka jingïalang ka long ban pan jingshai paidbah halor ka jingshah ktah kti ki samla jong ka shnong Mawkhyrwang ha ka 8 tarik mynta u bnai ha ka por 6:00 baje eiei janmiet ha Ïew Wahlapung.
Ha kane ka sngi la ïoh ruh ka jingpynshai bad jingkren na ki ar ngut kiba la shah ktah kti bad na ki sakhi kiba la don ha ka sngi 8 tarik mynta u bnai bad kumjuh ruh na u Myntri barim jong ka Shnong Mawkhyrwang bad na u Myntri ba mynta.
Ha kaba kut jong ka jingïalang ka Dorbar Shnong ryngkat ki paidbah ki la shim ïa ka rai ban leit sha ki bor jong ka aiñ ryngkat ka ejahar pyrshah ïa ki briew kiba donkti ban thaw jingkulmar khnang ba ka aiñ kan leh ïa kaba donkam.
Kiba donkti ha ka jingktah kti ïa ki ar ngut ki samla katkum ka jingïoh lum jingtip ki dei u Rismanwell Mylliem, u Shemphanglin Thongni, bad u Mysticalman Thongni.
Ha ka jingïalang la ïa donlang ha kane ka sngi ki long u Myntri shnong Mawkhyrwang, u bah N.D. Shylla, u Myntri Shnong Jerlang, u Bah Amstronglin Snaitang uba dei u Myntri shnong ba rim jong ka Shnong Mawkhyrwang lem bad kiwei de.