Shah ktah ki paidbah ha ka jingshlei um ka shnong khappud ha Borghat & heh um kynsan ka wah Tisang ba jurp palat u slap
Shah ktah ka skul RC upper Primary School ha ka jingshlei um
Khliehriat Jylliew 16: Ka shnong Borghat kaba don ha ki thaiñ khappud bad ka ri Bangladesh ha East Jaiñtia Hills District, mynta ka sngi ka la shah ktah ha ka jingshlei um kaba la jur bha kaba la tap lut ïa ki lynti ki syngkien, ki jaka rep bad buh jingma ïa ki paidbah, kumjuh ruh ka skul R.C Upper Primary Borghat ka la shah ktah ha kane ka jingshlei kaba la jia mynta ka sngi kaba na ka daw ka jingther jur palat u slap uba la neh mynta la lai saw sngi lynter.
Ki don ruh ki iing briew kiba la shah tap marshiteng ka iïng ha ka jingshlei um bad kane ka buh jingma ïa ki paidbah
Namar ka jingther jur u slap kaba la neh la bun- bun sngi ka la wanrah ïa ka jingdap kynsan ka um ha ka wah Tisang kaba don ha shnong Borghat, ha kaba ka um ka la jan kot bad iakynduh bad ka jingkieng.Kumjuh ruh ka um kaba lat lat ha ka wah Tisang ka la kit bad rong noh ïa ki dieng lyngkhot bad tap lut ïa ki jaka rep kiba don hajan katei ka wah, kane ka jingeh um ka wah Tisang ka lah ban buh jingma ïa kito ki nongking lieng kiba ju king ïa ki lieng kynda ha katei ka wah.