Shah ktah ki nongshong dukan ha ki surok bah bym ïoh laitluid ban leit ban wan ki briew ba nabar ka jylla

Nongpoh, Naiwieng 26 : Na ka daw ka jingmih ki huri hura hapoh ka jylla kaba la ktah ïa ka shongsuk shongsain ki paidbah, kaba dei hadien ka jingshah siat ïap ki 5 ngut ki paid Khasi ha Mukroh, West Jaintia Hills bad na kane ka jinghuri hura ka la ktah ruh ïa ka iew ka hat jong ki nongshong iew lah ban ong ym tang ha Ri Bhoi bad wat ha ka jylla hi baroh kawei.
Kiba bun ki nongshong shnong baduk ba kyrduh ki ju im jakpoh ban pyndap ïa ka ïing ka sem da kaba shong dukan ha ki surokbah bad naduh ba la mih kine ki huri hura bad khamtam ka jingshah khang ki nongleit nongwan na kiwei ki jylla kane ka la ktah ïa ki nongshong iew ba kim lah shuh ban die ïa ki jingdie ba ki die ha ki surokbah.
La sakhi ruh wat ka surokbah National Highway-6 ha Ri Bhoi, ka dei ka surok ba bun bah ki kali paidbah kiba ïaid ba ieng na kane ka surok, hynrei naduh ba mih ki huri hura na ka jingjia ha Mukroh la duna bha ki Kali ba nabar ba kim ioh laitluid shuh ban ïaid ban ieng lyngba kane ka surokbah.
Haba la ioh ban ïa kren bad katto katne ki nongshong dukan ki la pynpaw ka jingsngewkhia ba lada kane ka jinglong jingman kan dang bteng kan ktah shisha ïa ka kamai kajih jongki bad tang na kane ka jingjia ka jingdie ïa ki marbam mardih bad kumjuh ruh kiwei kiwei ki jingdie kum ki soh ki la hiar bha naba la duna ki briew kiba wan na shabar ka jylla.
Halor kane ka jinglong jingman kaba la ktah na katei ka jingjia ha Mukoh, ki nongshong dukan ki la kyrpad ïa ka sorkar Meghalaya ba ka dei ban shim khia ban ïa pynbeit noh mardor ban nym mih shuh ki kynrum ki kynram bad ha kajuh ka por ki pynrem jur ïa ki Pulit ka Assam kiba la leh ïa kane ka kam kaba la ktah ïa ka shongsuk shongsain ki paidbah ba ki dei ban shah pynshitom katkum ki kyndon ka aiñ.