Shillong, Risaw, 24: Ka jingkhang khyrdep ïa ki iew khappud lane ki border haat ka la ktah haduh katta katta ïa ka kamai kajih jong ki briew kiba shong basah ha ki shnong khappud ka Indo-Bangladesh ha ka thaiñ Mawsynram, East Khasi Hills, la ïathuh u MLA ka Mawsynram Constituency u Bah Olan Suin ha ka sngi Palei.
U Bah Suin u la pyntip ruh sha ki lad pathai khubor ba ka jingpynsangeh ïa ka khaii ka pateng ka la ktah haduh katta katta ïa ka kamai kajih ki paidbah kaba ju im kamai jakpoh da ki pateng.
“Ha iew kaba ki paidbah ha khappud ki ju thied bad die ka la sangeh syndon namarba ym lah shuh ban ïathied ïadie. Namarkata ka la ktah haduh katta katta ïa ka jingim jong ki paidbah kiba shong ba sah ha ki shnong khappud namarba ka iew ka la khang khyrdep haduh mynta,” la ong u Bah Suin.
U la bynrap ba katto katne ki briew kiba ju shaniah ïa ka kamai kajih na ki iew khapud mynta kim banse ban wad da kiwei pat ki lad ki lynti tang ban im kamai jakpoh.
U Bah Suin u la ïathuh ba ki paidbah kim banse ban leit phai biang sha ki kam rep, namarba dei tang kane ka lad kaba ki lah ban im. “Lada phi kwah ban kiew, phi hap ban trei ruh da kiwei kiwei ki kam,” u la ong.
