Shah ktah jur ki Samla Pule ba pynkhreh ïa ki Examim SSLC bad HSSLC ka MBoSE

Jowai, Ïaïong 08: Uwei na ki samla na ka thaiñ War Jaiñtia u Riki Mukhim mynta ka sngi 8 tarik ula phah daka jingthoh sha u Deputy Chief Minister ba dei peit ïa ka tnad bording, kumjuh sha chairman cum-Managing Director of Meghalaya Energy Corporation Limited (MeECL) bad sha Sub-Divisional Officer Amlarem Civil Sub Division, halor ka jingkynduh jingeh ki paidbah nongshong shnong na ka jingduh bording ha kylleng ki shnong ka thaiñ War Jaiñtia.
Kine ki Shnong ki kynthup ia ka shnong Nongtalang, Nongtalang shnong thymmai, Darrang, Shnong pdeng, Dawki, Bakur, Lamin, Sohkha, Sohkha Model, Sohkha Shnong, Pamtadong, Padu bad kiwei kiwei.
La pynsngew ba ki paidbah nongshong shnong ki mat ïaka jingeh ba khraw ha kine sngi naka jingshong dum khlem don bording namar ka jingshah pynthut ka bording ha u slap bad ka lyer naduh ka 25 tarik u Lber, 2022 tad haduh kine ki sngi.
Kane ka jingthut ka bording ka long ka jingduh kaba khraw shibun eh ïa ki paidbah ka thaiñ, khamtam ïa ki khynnah bad samla pule kiba dang don hapdeng ka jingïakhun ïaka Examination Matric (SSLC) bad class 12 (HSSLC).
Ka jingïai pyndik bad jingthut palat ka bording ha kine ki sngi, ki khynnah bad samla pule kiba la pynkhreh bha haka examination jong ki kim ïoh lad bha ban revised ïala ki lynnong kot jong ki hashwa ba kin leit thoh ïaka Examination sha ki centre jong ki.
Kane ka jingthut ka bording kala pynkhuslai jingmut bad buh jingeh ruh wat ïa ki samla pule Semester kiba dang ïai pynkhreh ïala ki jingpule, na ka bynta ki Examination bapher bapher jong ki, ki ban sa long haki sngi ban sa wan.
Bunsien la ju ïohsngew ïaki kyntien kaba ong ba ki khynnah bad samla pule ki dei ka lawei jong ka ri bad ka jaidbynriew baroh kawei, hynrei lada ka ïai long kumne na ka jingthut ka bording naka por sha ka por, shaei ka lawei jong ki khynnah bad samla pule jongngi kin poi? La buh jingkylli utei u samla.
Halor kane ka phang kum uwei na ki samla pule bala ju mad teng ïa kane ka soh sat, kumta daka mynsiem sngewsynei bad sngewlem ïala ki para khynnah bad samla pule, khnang ba yn lah ban weng ïa kane ka jingeh, kumta ula ai jingmut ïa ki bor ba dei peit ba nangne shakhmat lada long kaba lah ba kin phah ïaki briew ka tnad bording ba kin leit jurip manla ka por da kaba leit pynkhuid tista ïaki post light kiba don hakhlaw ha btap khnang baki diengbah kin nym ïoh ban kyllon bad ban pynjot ïaki postlight bad wire light.
Kumba long mynta tang mar ïahap u slap bad beh ka lyer bun naki shnong ha War Jaiñtia ki hap ban shongdum naka jingshah pynjulor ki post lightbad wire light haki diengbah. Sa kawei ruh u kyntu jur la kumno kumno ka dei ban don ïa ka jingpeitngor manla u snem ïaki post light bad lynti ïaid ki wire light khnang ba ki post light kin nym ïoh lad ban bam sarang bad shu kyllon ei kumto tang mar ïa wan ka aiom u slap bad ka lyer.
Haka por ba jurip ruh, lada lap ba don ki post light kiba la bam sarang dei ban kylliang ïaki haka por kaba biang bad kumjuh ruh dei ban pynkhuid bha bad pom ruh ïaki dieng kiba don jingma ïaka lynti ïaid jong ka bording bad ym dei ban ap haduh ba u slap ka lyer kin ïoh ban pynkyllon suk ïaki.
Sa kawei ka khubor na ka Dorbar Shnong Nongtalang lyngba u ma Du Myrchiang la ïathuh ki katto katne tylli ki shnong kiba don hapoh ka Sub-Division Amlarem, ki la mad ïa ka jingeh la ar taiew kynthih mynta namar ba ki hap ban shong dum khlem don bording electric.
Ka jingduh bording jong kitei ki shnong ka long dei namar ba ha kine ki khyndiat sngi ba la dep ba jur slap palat bad ki post light kiba don harud surok bah Amlarem-Dawki ki la khyllem dei namar ka jingtwa khyndew bad shlei um.
Na ka liang ki Line men ka MeECl kiba dei peit ïa kitei ki thaiñ ki ïaleh shitom katba lah na ka bynta ban pynbiang bording ïa ki paitbah hynrei kim lah ban leh eiei namar ki tiar ba ki ïoh ban pyndonkam ki dei ki tiar kiba la dep pyndonkam lypa kane ka wanrah ïa ka jingeh namar tang shu hap slap malu mala ka bording ka la duh.
Kiba mad ïa ka jingeh ki dei khamtam ki khynnah skul bad kiba duk ba rangli, nalor ba hap ban siew bill light man u bnai lada ym ïoh pyndonkam ruh mynta pat hap thied da ki bombati ban shai, kumta la kyrpat bad kyntu ïa ka Tnad MeECl ba peit ïa ka thaiñ Amlarem ba kan shimkhia mardor.