Shah khyrwit ka Kompani ba trei torti ïa ka ISBT

Ujor ka TUR sha ka Lokayukta
Shillong, Jymmang 16: Ka Thma u Rangli hynne ka sngi nyngkong kala buh da ka jingujor hakhmat u Chairperson ka Meghalaya Lokayukta kat kum ka Meghalaya Lokayukta Act, 2014 halor ka jingkynnoh shna torti ïa ka Inter State Bus Terminal (ISBT) ha Mawlai Mawiong.
Ka Nongïalam ka TUR Kong Angela Rngad kala pyntip ba ïa kane ka ISBT la tei da ka Tnad Public Works Depart ment (PWD) ka Sorkar Jylla ha ka jinglut ba kot T. 48 klur bad la plie ïa ka dang ha u bnai Naitung 2021 da u Myntri kam Pohïing ka Ri u Amit Shah.
“Hynrei tang hadien hynriew taiew ba pyntreikam ïa ka, kane ka jingtei ba dang shisnem duna, kala da orpait bad pei um ha kiba bun ki jaka” kala ong.
Ka Kong Angela kala dawa ba dei ban tohkit ïa kane ka jinglong jingman jong kane ka jingtei kat kum ka bor bala pynkup da ka Meghalaya Lokayukta Act, 2014.
Ka Kong Angela kala ong ba kine kiei kiei baroh kila jia na ka jingbym shimkhia jong ki Nongtrei Sorkar ka Tnad PWD ban leit khmih bad ai jingbthah ïa ki Contractor bad ki Agency ba pyntrei ïa ka Project.
Kala kynnoh ruh ïa ka Tnad Transport ka Sorkar Jylla ba ka khlem da bishar bha ïa ka jingtei hashuwa ka jingaiti ïa ka project. Kala suba jur ruh ba ka don ka jingtrei bymhok da ki Contractor/Kompani kiba pyntrei ïa kane ka jingtei.

Shillong, Jymmang 16 : Hadien ba la paw pyrthei ki jingtrei torti ïa ka Inter State Bus Terminal (ISBT) Mawiong da ka kompani kaba na kane ka jylla hi namar ha ka sngi ba ther u lapbah ha kane ka nongbah ha ka Sngi Thohdieng katei ka ophis ka la pei um lut kumba hap u slap kumta ruh jaw ka um shapoh ki kamra. Kumta kane ka kompani ka la shah khyrwit na baroh ki liang naduh ki nongmihkhmat paidbah haduh ki seng bhalang bapher bapher namar ïa kane ka ISBT la wan ban plie paidbah ruh da u Myntri Kam Pohïing ka ri u Amit Shah bad ka dang sdang ban treikam ruh da kumba 6 taiew ei ei mynta. ïa kane ka ISBT la tei ha ka jingmang pisa kaba 48 klur da ka tnad DoNER lyngba ka NEC.
Haba kren ha u nongthoh khubor u MLA ka Mawlai u bah Process T Sawkmie uba katei ka ISBT ka hap hapoh ka Constituency jongu u la ong, ka sorkar ne ka tnad ba dei peit kata ka tnad Transport bad ka PWD (Building) ki dei ban phah biang ïa ka komapani ban tei da kawei ka ïing namar lada katei ka ïing ophis kaba dang thymmai ka la da pei kan buh ïa ki paidbah ha ka jingma lashai la shisngi bad ka lah ban shu twa kyndit kyndit. U la ong lada dawa tohkit ruh kan shu slem kai ka por bad kaba kongsan ka long ba ki tnad sorkar kiba dei peit ki dei ban phah tei beit ïa katei ka kompani da kaba thymmai.
Na ka liang u President ka BJP u bah Ernest Mawrie u la ong ba ki tnad ba dei peit ban tei ïa katei ka ïing ophis ki dei ban hiar bishar bniah sha katei ka jaka bad lada lap ba ka don kata ka jingpei um kaba nyngkong eh ka long dei ban “ Black List” noh ia ka kompani ne kontraktor ba pyntrei ïa katei ka jaka nalor kata ha kajuh ka por dei ruh ban pynshitom kat kum ka aiñ ïa ki Engineer kiba peit bad pynïaid shakhmat ïa ka kam namar kane ka la dei ka jingtrei torti da shisha. Kane ka la buh ïa ka jylla ha ka jinglehraiñ nalor ba la wan plie kat da u Myntri Kam Pohïing ka ri u Amit Shah ha ka 24 tarik Naitung 2021 bad ka pisa ruh ka dei kaba la bei da ka tnad DoNER lyngba ka NEC kumta dei ban thung da ka jingtohkit bad pynshitom kat kum ka aiñ ïa ka kompani, kontraktor bad ki engineer kiba dei peit ia katei ka jingtei.
Na ka liang ka KSU bad HNYF ki la pynpaw ba kane ka dei ka jingtrei torti bad trei tang dep rukom da ki tiar kiba tad tor bad kane ka pynpaw shai kdar ba ka jur palat ka jingbamsap ha kaba tei ïa katei ka ISBT da ka kompani.
Na ka liang u President ka KSU u bah Lambokstar Marngar u la ong ba ka tnad transport ka dei ban wad bniah ïa ka daw jong kane ka jingpei um katei ka jingtei ïing ophis Transport kaba thymmai bad pynshitom ïa kiba donkti naduh ki kontraktor haduh ki engineer kat kum ki kyndon ka aiñ. Nalor kane dei ruh ban thung da ka jingtohkit ban paw lut ki jingshisha halor ka jingtrei torti ïa katei ka ïing ophis. Nalor kata u la ong dei ruh ban pynbha kloi ïa katei ka jingpei ha katei ka ïing ophis ban lait na kino kino ki jingjia ba sngewsih.
Kumjuh ruh u President ka HNYF u bah Sadon Blah u la pynpaw ba kane ka dei ka jingtrei torti bad tangdep ïa kane ka ïing ophis da ki tiar kiba tad dor. Kane ka dei ka jingbam sap kaba shyrkhei bha namar kumno ka ïing ophis kaba dang shu dep tei kan pei noh. U la ïathuh na ka liang ki dkhot ka seng kin sa leit jurip ïa katei ka jaka ban lap da la ki jong ki khmat. Na ka liang ka HNYF ruh ka dawa ba dei ban thung ka jingtohkit ban paw lut ki jingshisha baroh.