Shillong, Jymmang 01: U Nongïalam ka BJP bad MDC ka Tura Bernard N Marak hynne ka sngi U Blei ula kynnoh ba ki Nongtrei jong ka National Peoples Party (NPP) ki la khyrwait, shet kylla bad pynlong riewkai ïa u Myntri Rangbah ka Jylla Conrad Kongkal Sangma bad ka para kaba dei ka MP ka Tura, ka Agatha K Sangma da kaba kjit ïa bun bah ka pisa na ki project MPLADS bad SUWP khlem da pyntreikam ïa ki bad kine ki skhim ki la shu long tang ha ka rngai ne snaiap.
Kat kum ka jingong jong u, kiba bun ki project jong ka MPLADS bad SUWP ki dei ki project “snai-ïap” ha kaba ki Nongtrei ka NPP kila shu bam klop ïa ka pisa khlem ka pyntreikam ïa kine ki project.
“U Myntri Rangbah ka Jylla Conrad Sangma bad MP ka Tura Agatha Sangma kila shah shukor hala ki jong ki Nongtrei bad ki Contractor. Ka jingpyndonkam bakla ïa ka pisa u paidbah ka dang ïai bteng bad la lap ruh lyngba ka RTI ïa ka jingdon bun bah ki project “snai-ïap” ha South Tura Constituency ba mihkhmat da u Myntri Rangbah bad ha Tura kaba sah ha Agatha Sangma” ong u Bernard ha ka kyrwoh khubor.
Une u Nongïalam ka BJP u ong ba ka RTI bala pan na Tura Municipal Board kala pynpaw ïa bun tylli ki project “snai-ïap” bala mang na ka SUWP (2018-2019) bad MPLADS (2017-2018), ïa kiba la pyni ba la dep ban pyntreikam hynrei kim shym la paw satia haduh mynta.
“Napdeng kiba bun ki project bala pynbna kiba la dep, nga kwah ban wanrah sha ka rynsan u paidbah khamtam ïa ka sep ha lum jingtep ba don ha ka dong ba nga sah (Kongbe Ading) ha kaba kawei ka Nongtrei ka NPP ula ïoh T. 3 lak na ka MPLADS ha u snem 2017-2018. Kala ïoh biang sa T.1 lak na ka SUWP jong u CM ha u snem 2018-2019 ban shna ïa ka sem da ka maw ha kane ka juh ka lum jingtep ïa kaba la pyni bala dep ban shna katkum ka RTI hynrei kaei kaba paw hi ka long ba ka sem kaba don mynta ka dei ka sem ba shipor bala shna hi da ki paidbah” ula ong.
U Bernard ula ong ba kane ka lum jingtep ka dei kaba pyndonkam da ka shnong Kongbe Ading bad Ranggira bad ïa kine ki jingmang tyngka ïa kane ka juh ka sem la ai sha ka kyrteng jong kawei ka Kynthei.
Hynrei ha ka jingleit jurip, ka sem kaba lap ha kane ka lum jingtep ka dei kaba la shna hi da ki paidbah lyngba ka jingianoh synniang hi dalade ym bala ai pisa na ka MPLADS lane SUWP.
“Nalor kane, kane ka lum jingtep ka dei jong ka Kongbe Ading bad kam hap satia hapoh ka Municipal hynrei kane ka Nongtrei ka NPP kala ïoh ïa ka jingbei tyngka lyngba ka Municipal khlem ka jingtip u paidbah bad ki Ophisar bala pynthikna bala dep shna ïa kane ka sem ruh kila shu pynthikna khlem da leit jurip” ula ong.
Une u Nongïalam ka BKP ula ong ba kane ka RTI ka khlem pynpaw satia ïa ka kyrteng jong kane ka Nongtrei ka NPP haba dawa ïa u Myntri Rangbah ka Jylla bad ka MP ba kin leh eiei ïa kane ka kam bymman bad jingpyndonkam bakla ïa ka pisa u paidbah lem kumta, ka BJP kan shim ïa ka lynti jong ka aiñ. Ula ong ba kane ka dei tang kawei na ki project “snai-ïap” kiba la paw na ka MPLADS bad SUWP ha Tura South.
“Kaba ar,ka Municipal kala kiar ban ai ïa ki jingtip ba bniah ha ka RTI bala leit pan na ka Tura Municipal Board haba ïadei bad ka thup jong ki kyrteng briew ba ïoh skhim. Ngi la pan biang ïa ki jingtip na ka RTI ban ïoh ïa ka jing tip ba bniah ïaka thup kyrteng kiba ïoh skhim bad ki SHG kiba ïoh ïa ki skhim bapher bapher kynthup ïa ka NULM bad kiwei ki skhim ka Sorkar Pdeng” ula ong haba pynpaw ba ki paidbah kim dei satia ban duh ïa ki jingmyntoi bala ai da ka Sorkar Pdeng.
