Shillong, Nailar 03: U Iminstar Mawlong, rangïalehkai phutbol ka Jylla Meghalaya u don mynta ha Goa na ka bynta ka prokram pyrshang jied (trial) ïa ki nongïalehkai kiba lah ban mihkhmat ïa ka kynhun U-17 jong ki khynnah shynrang jong ka ri India.
Kane ka Trial kan bteng haduh ka 04 tarik Nailar.
Une u khynnah samla u dei shi bynta jong ka Bhaichung Bhutia Football Schools Shillong bad u dei tang ma u hi na Meghalaya ban paw kyrteng ha ka thup jong ki 12 ngut ba la pynbna da ka All India Football Federation, ha kaba kiwei pat ki dei kiba wan na Goa, Chhattisgarh, Mizoram, Manipur bad West Bengal.
U Iminstar u la long u rangïalehkai phutbol ba dang samla ba tyngshaiñ bha ha kine ki ar snem ba la dep, hadien ba u la mihkhmat ïa ka Meghalaya ha ka Subroto Cup 2023 bad ha ka Junior Boys National Football Championship 2024, bad u rangïalehkai jong ka kynhun U-16 jong ka Shillong Sports Association kaba la rah ïa ka nam lahduh ha ka Meghalaya Youth League jong u snem ba ladep bad ruh jong ka Madan SCC, ka lahduh jong ka SSA’s U-20 Fourth Division jong u snem 2024.
Hadien nangta u la leit ïalehkai da ka ram sha ka Nongkseh ha kaba u la long uwei na ki rangïalehkai ba dang khynnah tam ban pynkhihjar ha ka SSA’s First Division.
