Shah khot ka Amanjot, Pratika sha ka jingïalehkai Test ha Australia, yn ïalam ka Radha Yadav ïa ka India A ha ka Rising Stars Asia Cup

Mumbai, Kyllalyngkot 24: Ka Board of Control for Cricket in India (BCCI) ka la pynbna ïa ka kynhun ïalehkai jong ki kynthei na ka bynta ka one-off Test pyrshah ïa ka Australia, ha kaba ki don katto katne ngut ki durkhmat ba thymmai kiba la wan ïasoh bad ka kynhun ïalehkai red-ball jong ka India, kumjuh ruh bad ka kynhun ïalehkai India A na ka bynta ka ACC Rising Stars Asia Cup ka ban sa wan.
Ki don shibun ki nongïalehkai ba thymmai ha ka kynhun ïalehkai Test haba ïanujor bad ka kynhun kaba la ïakhun khatduh ïa ka Australia la jan ar snem mynshwa ha Mumbai, ha u bnai Nohprah 2023. Ka thei ïalehkai All-rounder ka Amanjot Kaur bad ka Pratika Rawal ki la ïoh ïa ka jingshahkhot ba nyngkong eh napdeng ki nongtied, katba ka Kranti Gaud, ka Vaishnavi Sharma, bad ka Sayali Satghare ki dei ki nongïalehkai kiba dang shu wan rung ha ka thup ki nongkawang bol na ka bynta ka jingïalehkai Test.
“Ka Women’s Selection Committee ka la jied ïa ka kynhun India na ka bynta ka jingïalehkai Test ha Perth pyrshah ïa ka Australia Women kaba yn sa pynïalehkai hadien ka white-ball series. Ka jingïalehkai Test kan long ha WACA naduh ka 06 tarik haduh 09 tarik u Lber, 2026,” la ong ka BCCI ha ka kyrwoh.
Ka board ka la pynbna ruh ba ka nongap wicket kaba dei ruh ka nongtied (wicketkeeper-batter) ka G Kamalini kan nym lah ban ïalehkai na ka bynta ka kynhun ha ka white-ball series ha kane ka jingleit jngoh ka India ïa ka Australia namar ka jingsngewkhia ïa ka jingmynsaw. Ka Uma Chetry ka la shah jied kum ka nongbujli jong ka ha ka T20I bad ODI.
Kaba kham paw ka long ba dang shen ka (G Kamalini) la shah weng noh na ka jingïalehkai jong ka Mumbai Indians ha ka Women’s Premier League (WPL), ha kaba ka Vaishnavi ka la bujli ïa ka ban mih madan ha ka sien ba nyngkong eh.
Ka selection committee ka la jied ruh ïa ka kynhun India ‘A’ kaba khlaiñ na ka bynta ka Rising Star Women’s Asia Cup, ka ban long ha Thailand ha ka rukom ïalehkai T20 format. Katba ka Radha Yadav kan ïalam ïa ka kynhun sha kane ka lympung, hynrei ka jingïashim bynta jong ka Deeya Yadav bad ka wicketkeeper ka Mamta M kan long katkum ka jingpynbna ïa ka koit ka khiah na ka BCCI Center of Excellence (CoE).
Ka thup kyrteng jong ka India na ka bynta ka jingïalehkai Test: Harmanpreet Kaur (c), Smriti Mandhana (vc), Shafali Verma, Jemimah Rodrigues, Amanjot Kaur, Richa Ghosh (wk), Uma Chetry (wk), Pratika Rawal, Harleen Deol, Deepti Sharma, Renuka Singh Thakur, Sneh Rana, Kranti Gaud, Vaishnavi Sharma, Sayali Satghare.
Ka thup kyrteng jong ka India A na ka bynta ka ACC Rising Star Asia Cup Team: Humairaa Kaazi, Vrinda Dinesh, Anushka Sharma, Deeya Yadav*, Tejal Hasabnis, Nandani Kashyap (wk), Mamta M (wk)*, Radha Yadav (c), Sonia Mendhiya, Minnu Mani, Tanuja Kanwer, Prema Rawat, Saima Thakor, Jintamani Kalita, Nandani Sharma.