Shillong Risaw 13: Tang hadien katto katne sngi ba ka HYC ka la kurup bad thang ia u drok, u Nongïalam ka HYC Sengkmie u Bah Isaac Basaïawmoit u la shah pynngat ha ki 4 tylli ki case hapoh Rynjah Police station halor ka kam khynra drok hapoh Nongbah Shillong.
Ha ka kyrwoh khubor ba la phah, na ka liang ka Seng HYC sengkmie lyngba u President u Bah Roy Kupar Synrem ka la pyntip sha ki paidbah ba u Bah Isaac Basaïawmoit u la shah khot hajir ha ki pulit ka Rynjah Police station ha ka step jong ka sngi nyngkong ka 14 tarik mynta u bnai ha ka por 10 baje mynstep.
Ha kaba iadei bad kane ka jingshah khot hajir na ka liang ki pulit ki la pynngat kyndon aiñ ïa utei u nongïalam ka seng uba dei ruh u Secretary ka HYC CEC namarba khynra drok bad thang ïa ki drok ba la ïoh ban kurup bad ba la ïoh kem na ki nongdie drok hapoh ka thaiñ Rynjah ha kine ki sngi ba lah dep.
“Kumta ka seng ka kyntu ïa phi ki paidbah kiba sngewkhia halor kane ka kam ba phin ïamih ban ïaleit sha Rynjah Police station ha ka 14.10.24 ha ka por 10.30 baje mynstep ban pynpaw sha ki pulit bad ki bor sorkar ba kim dei ban pynwit bad ban kheiñ beaiñ ïa ki nongïalam bad ki dkhot ka HYC hynrei ba kin pyni kam shwa ïa ki nongkhaïi drok kiba dei ki nongpynjot ïa ki khun samla ka jaitbynriew bad katta nang pynngat kyndon aiñ ïa ki nongïalam bad dkhot ka HYC katta ka seng kan nang pynkhlaiñ bad pynjur ka jingkhynra drok bad ruh ban thang ïa ki,” ong u President ka HYC sengkmie u Bah Roy Kupar Synrem.
