Shillong, Naitung 4 : Mynta ka sngi ki pulit ka nongbah Shillong ki la khot hajir ïa u PS Lyngdoh uba pynmih khubor YouTube namar ki jingkren kynthoh pynshit jaidbynriew jongu lyngba ka channel jongu. Ym tang ba u shah khot hajir la maham ruh ba lada u dang bteng nangne shakhmat un ngat ha ki kyndon aiñ kiba pyrkhing.
Une u nongpynmih khubor youtube u khlem da bud ïa ki kyndon treikam kat kum ba la saiñdur na ka bynta ki lad pathai khubor. Kumta ïa une la khot hajir mynta ka sngi sha Sadar Police Station.
Hooid ym don jingkhang ban pynmih khubor YouTube tangba hap ban da ïoh jingithuh na ki bor ba dei ban ithuh nangta hap ban bud ïa ki kyndon ban pynmih ïa ki khubor kam mut tang ba dei ha ri synshar paidbah lah ban kren laitlan ne kynthoh laitlan katba mon kiba lah ban wanrah pat ka jingsngew ïapher jaid-bynriew bad pynthut ïaka suk ka sain.
Ha kine ki khyndiat por la shu mih laitlan ki khubor social media lyngba ki YouTube, Facebook, Instagram bad tang ban ïoh pynmih khubor ki la biang kim tip kiei ki kyndon ba dei ban bud bad ba ym dei ban pynmih ne pyni sha ki paidbah ruh nalor la kynthoh katba ki sngewkwah ban kynthoh ne kat kiba wan ha ki bor jingmut jingpyrkhat jongki.
Kumta na ka liang ki bor ka aiñ ki kyntu ïa baroh ba ym dei ban shu pynmih ki khubor katba mon ne khlem nongrim, dei ban da wad jingtip bniah, dei ban ïoh jingbit bad jingithuh khnang ban lait na kino kino ki jingshah pynngat kyndon.
