Shah khot 3 ngut ki thei ïalehkai ka jylla sha ka U-17 National Team Trial

Shillong, Nohprah 07: Lai ngut ki thei ïalehkai phutbol ka jylla Meghalaya kiba la tip kyrteng da ka Eiladki Ksoo, ka Ibashembha Khongsit bad ka Ibadarihun Nongsiej, ki la shah khot ban shim bynta ha ka prokram pyrshang lane ka trial na ka bynta ka kynhun ïalehkai phutbol U-17 ki kynthei jong ka Ri India (U-17 Women’s National Team Trial), kaban sa long ha Bangalore.
ïa kine ki lai ngut la jied katkum ka jingtbit jong ki ban ïalehkai ha ka Meghalaya Women’s State League kaba dang shu kut dang shen. Ka Eiladki bad ka Ibadarihun baroh ar ngut ki la mihkhmat ïa ka Laitkor, katba ka Ibashembha pat ka la ïalehkai na ka bynta ka Mawlum Tyrsad.
“Kane ka jingjop jong ki ka kren shaphang ka jingaiti lut jong ki bad shaphang ka jingnang khlaiñ jong ka jingïalehkai phutbol jong ki kynthei ha ka jylla jong ngi,” la ong u President ka Meghalaya Football Association u Hamletson Dohling.
“Ka long kaba ai mynsiem ban ïohi ïa ki nongïalehkai ba dang khynnah kiba mih shakhmat bad ban shim ïa ka jaka jong ki ha ki rynsan kiba kham heh,” u la ong.
U la kyntu ruh ïa kitei ki thei ïalehkai ba shah jied, ban leit sha ka trial ryngkat ka jingsngew skhem, ka jingsngewrit bad ban long ba la kloi ban shah hikai. “La ka long kumno kumno ruh ka jingmih, kane ka kabu ka long kaba dei hok. Ngi kitbok kitrwiang ïa ki baroh,” la bynrap u Bah Hamlet.