Shah khang ki paidbah kiba rah plakad bad lama ïong ban rung sha ka Public Hearing

Shillong, Nailur, 23: Ki paidbah jong ka shnong Nonghali ki la ai jingkyrshan radbah ïa ka jingtyrwa ban shna ïa ka jaka theh ñiut katkum ka juk stad saïan hapoh ka shnong.
Ïa kane la pyntip da u Sordar jong ka shnong Nonghali Hunboklang Mynsong hadien ba la kut ka jingpynsngew paidbah ba la pynlong da ka ophis jong u Chief Executive Officer (CEO) ka Shillong Municipal Board (SMB) bad ba la pynïaid da ka Meghalaya State Pollution Control Board (MSPCB) ha ka sngi Baar.
Katkum ka jingïathuh jong u Bah Mynsong, ka jingpynsngew paidbah halor ka projek ka la long kaba seisoh, ha kaba kam shym la don kano kano ka jingpyrshah na ki nongshong shnong jong ka Nonghali.
Hynrei u la ïathuh ba ki paidbah ki la pynpaw ïa ki katto katne ki kyndon na ka bynta ka jingai jingkyrshan jong ki kiba kynthup ba ka Sorkar ka dei ban pyntreikam thik kumba la pynshai bad kular, da kaba pyndonkam da ki buit stad saïan.
U Bah Mynsong u la pyntip ba ka shnong ka la dawa ban shna da ka surok kaba paka, ka bording ilektrik kaba biang bad kiwei kiwei ki jingdonkam hapoh ka jaka ba la wanrah ïa ka projek.
“Ka Sorkar ruh ka la kular ban aikam aijam ïa ki trai shnong, ïa kaba la pdiang ruh da ki paidbah,” u la ong.
Shuh shuh, u Sordar u la pyntip ba ka shnong ka la dawa bai lutksan kyrpang na ka bynta ki trai jaka, haba pyrkhat ïa ka jingdonkam jong ka projek bad ka jingkitkhlieh kaba ka shnong ka la shim.
“Ngi sngewdei ba ka Sorkar ka dei ban pyrkhat lem da kaba siew ïa ka bailutksan ba kyrpang namarba ka shnong ka la shim halade ïa ka jingkitkhlieh na ka bynta ban pynbiang ïa ka jingdawa jong ka district baroh kawei,” u la ong.
U Bah Mynsong u la kyrpad ïa kito kiba pyrshah ïa ka projek ba kin pynpaw ïa ki jingeh jong ki da ka jingthoh sha ka Dorbar Shnong, khnang ba kin dup shong bishar bad ban pynbeit ïa ki.
U la pynpaw ruh ïa ka jinglyngngoh ïa ki jingïakhih ba la pynlong da ki katto katne ki kynhun, da kaba ai jingmut ba ki ladei ban leit sha ka jingpynsngew paidbah ha ka jaka ban ïakhih ha surok.
Haba kylli, u Sordar u la ong ba ka jaka na ka bynta ka jingshna ïa ka projek ba la tyrwa ka dei kaba dang hap hapoh ka Dorbar Shnong Nonghali bad ïa ka pisa kaba wan lyngba ka projek yn sa pyntreikam ha ka rukom kaba dei.
Dang shen ha u Lber mynta u snem, u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar u la pyntip ba ladep ithuh bad jied ka jaka kaba heh 112 akar ha ka shnong Nonghali.
Ka Sorkar ka la thung ruh ïa ka Accredited Consultant na ka bynta ban pynkhreh ïa ka Environmental Impact Assessment (EIA)/Environmental Management Plan (EMP) bad ban ïoh ïa ka jingbit katkum ki kyndon aiñ na ka bynta ban shna ïa ka jaka thehñiut da ka juk stad saïan ka ban treikam na ka bynta ki shnong kiba don ha Sor Shillong bad ki shnong khap sor.