Nongpoh, Nailur, 02: Ki kynhun sengbhalang ba kynthup ïa ka RBYDSO, MPUF bad MPSO Womens Wing mynta ka sngi ki la bteng ban khynra ïa ki dukan bam kiba don ha ka thaiñ Nongpoh la ki bud ne em ïa ki kyndon khamtam ban leh khuid haba shet bad ai bam sha ki paidbah, ryngkat ki kot ki sla ba biang ïa ki dukan bym dei ki trai muluk.
Ha ka jingleit jurip bad ban talasi ïa ki dukan bam naka liang kitei ki 3 seng ki la lap ba bun naki dukan khamtam ki dukan bar jylla kim shym la bud ïa ki kyndon, ban lehkhuid naduh jaka shet bad kim shym la don ruh ki kot ki sla kiba biang, bad kim banse ban khang khyrdep syndon ïa kitei ki dukan kiba lehsih ryngkat ka jingmana ba kim dei ban plie lada kim lah ban leh khuid ïa ka bam ka dih haba ki die sha ki paidbah ryngkat ki kot ki sla kiba biang.
Haba kren sha ki lad pathai khubor, u bah Kerbok Malai kum u President ka RBYDSO u la ïathuh hadien ka jingjurip kynsan ki la lap ba bun naki dukan kim shym la don ïa ki kot ki sla kiba biang bad bun ki dukan kim shym la suidñiew ïa ka jingkhuid jingsuba ha kaba ïa dei bad ka bam ka dih kaba lah ban ktah ïa ka koit ka khiah jong ki paidbah.
U bah Kerbok u la pynpaw ruh ba naka liang ka seng ka dap daka jingsngewkhia ba kine ki trai dukan kim shym la suidñiew ban bud ryntih ïa ki kyndon katkum ba la buh daka tnad Food and Safety namar ha kane ka sngi lap ba bun naki dukan ki la nang bteng ka jingleh sih leh jakhlia ha ki dukan bam khamtam ha ki jaka shet.
U bah Kerbok Malai u la ïathuh ba ka seng kan nym shong khli kti bad nangne shakhmat ka seng kan nang bteng ban leit jurip bad ban nang buddien ïa ki dukan ba ki la sdang ne em ban lehkhuid bad lada nang lap ïa ka jingïaid lait ïa ki kyndon bad lehsih, ka seng kam banse ban shu khang khyrdep beit ïa ki dukan.
