Shah kem uba pynphriang ïa ka Video jong ka EVM ba pyni ïa ki vote ki poi sha ka BJP

Shillong, Rymphang, 18: Uwei u briew ïa uba la tip kyrteng kum u Bolong R. Sangma u la shah kem ha ki Pulit halor ka jingpynphriang ïa ka video ha ka 16 tarik mynta u bnai halor ka jingkynnoh ba ki Electronic Voting Machine ki dei kiba la leh buit tuh.
U Chief Electoral Officer (CEO) jong ka Jylla u Bah F.R Kharkongor ha u kyrwoh ba la phah sha ki lad pathai khubor u la ïathuh ba u Bolong R. Sangma u la shah kem ïa ki Pulit halor ka jingkynnoh ba u la pynphriang ïa ka video ha ka rynsan jong ka social media ba kam ba la pynshisha lada khñiot ha uno uno u budam jong ka EVM ka vote kan leit beit sha ka BJP.
Ïa u Sangma la kem hadien ba u Returning Officer jong ka Rongjeng Assembly Constituency u la mudui da ka ejahar sha ki Pulit.
Ïa kane ka case la rejistar pyrshah ïa u hapoh ka Section 171 G jong ka Indian Penal Code (IPC), kaba ïadei bad ka jingpynphriang khubor lamler ha kaba ïadei bad ka elekshon, la ïathuh u Bah Kharkongor.
Ki EVM lane ki Electronic Voting Machine ki dei kiba la ïada na ka jingshah pynjot bad lada don kano kano ka jingpyrshang ban leh thok ka mashin kan leit biang sha ka Factory Reset Mode, ong u Bah Kharkongor bad bynrap ba ïa ka mashin la shna kyrpang ïa ki jingïada ha baroh ki bynta jong ka mashin.