Shah kem u President ka NEHUSU ba shah kynnoh ktah kti ïa u Professor, 7 sngi ha judical custody

Shillong, Ïaiong 28 : U President jong ka North Eastern Hill University Students’ Union (NEHUSU) u Sandy Sohtun u la shah kem noh ha ka sngi Nyngkong halor ka jingkynnoh ba u donkti ban ktah kti pynmynsaw ïa u assistant professor jong ka Hindi Department jong ka skulbah NEHU.
Haba pyntikna ïa kane, u Superintendent of Police ka East Khasi Hills, Bah Vivek Syiem u la ong ba ka jingkem ïa utei u nongïalam ka NEHUSU ka dei hadien ba ki la ïoh pdiang ïa ka ejahar na utei u nonghikai. Shuh shuh halor ka jingkylli, u SP u la ong ruh ba ka jingtohkit ka dang ïaid mynta bad baroh kiba donkti ha katei ka kam kin sa shah kem.
Lah ban kdew hangne ba kane ka jingjia ka la jia ha ka 24tarik mynta u bnai.
Na ka liang u assistant professor ka Hindi Department, u Dr. Alok Singh ha ka ejahar ba u ujor sha Mawkynroh Outpost ha ka 25tarik mynta u bnai, u la kam ba katei ka jingshah ktahkti jong u ka la jia ha ka janmiet jong ka 24tarik mynta u bnai.
La kynnoh ruh ba ha katei ka ejahar la kdew ba ki don san ngut kiba la donkti ban ktah kti ïa utei u professor.
Ka Ïing Kashari ha ka sngi Nyngkong ka la hukum ban set 7 sngi hapoh judicial custody ïa utei u nongïalam ka NEHUSU.