Shillong, Jylliew, 01: Arngut ki briew kiba kynthup ïa uwei u nongniah bad ïa u nongbud jong kawei ka kali Super Cary Pick-up Truck kaba don ïa u nombar ML05T-8200 ki la shah kem ha ki Pulit jong ka Madanryting Police Station hadien ba ki la pynkheiñ ïa ki kyndon niah kali bad tynrah beit da ka kali ïa u Pulit Home Guard Volunteer uba pyrshang ban pynsangeh ïa ki.
Ïa kine ki arngut la tip kyrteng kum u Johnyriah Marboh, u nongniah jong ka kali uba sah ha Upper Shillong bad u nongbud u Augstine Marboh uba sah ha Nongrah Umjapung.
Kane ka jingjia ba la ïoh ringdur da ki riewpaid ka la saphriang haduh katta katta ha ka Social Media ha ka sngi Baar.
U Superintendent of Police (City) ka East Khasi Hills District u Bah Vivek Syiem ha u kyrwoh ba la phah sha ki lad pathai khubor ha ka sngi Baar u la ïathuh ba ha ka 31 tarik, Jymmang, 2022 ha ka por kumba 11:30 baje mynstep ba kine ki arngut ki nongniah jong kane ka kali ki la pynkheiñ ïa ki kyndon ñiah kali ha lad surok Nongthymmai kat haduh ba ka la wanrah ïa ka jingdheng kali kaba jur hapdeng surok.
Katba u Pulit Home Guard Volunteer uba la tip kyrteng kum u Dwustar Lyngkhoi jong ka Madanryting Traffic Branch uba pynïaid ïa ki kali ha kane ka surok u la pyrshang ban pynsangeh ïa ka kali, hynrei u nongniah uba leh bym salia ïa une u Traffic Home Guard u la pyrshang ban phet krad bad tynrah ruh da kali ïa une u Traffic Home Guard katba u nongbud jong ka kali u la hiar bad ktah kti ruh ïa une u Traffic Home Guard.
Ïa kine ki arngut, ki Pulit ki la pynngat hapoh ki kyndon 279/353/34 jong ka Indian Penal Code (IPC) bad ki Pulit kin sa rah ban tian bishar ha Kashari.
