Shillong, Nohprah 11: Uwei u nong Ghana uba la 35 snem ka rta uba kyrteng u William Addo Agyei, u la shah kem ha ki pulit ka West Jaiñtia Hills hadien ba u la ïaid lynti bad leit jingleit da ki jingpynithuh kiba thok ïalade (fake identity).
Katkum ka jingïathuh jong u SP ka West Jaiñtia Hills u Jagpal Singh, une uba la shah kynnoh haba sdang u la kam ba u kyrteng u Stanley Obayendo, hynrei ha ka por ba tohkit u la pynpaw ïa ka jingpynithuh kaba shisha.
U Agyei, uba dei u nongshong shnong ka Kumasi Accra, Ghana, u la rung sha India lyngba ka medical visa ha u bnai Jylliew 2025, kaba la kut noh hadien 3 bnai. Wat hadien ba u la aplai ban pynjlan, u khlem ïoh ïa ka jubab napoh ka Foreigners Regional Registration Office (FRRO).
Dangshen u la ïohpdiang ïa ka email na ka FRRO kaba la bthah ïa u ba un ai jingtip sha ka office jong ki ne sha ki pulit ka Banaswadi Police Station ha Bengaluru, Karnataka.
Naba u khlem lah ban bud ïa kitei ki jingbthah, u la leit pan ka jingïarap na u wei u briew u Frank, uba la pynbeit na ka bynta jong u ban jam sha ri Bangladesh lyngba ka Meghalaya. Hynrei u la shah bat noh ha ki nongshong shnong bad hadien la kem noh pat da ki pulit.
Na ka liang ki pulit ki la register case pyrshah ïa u Agyei ba u la leit jingleit halor ka jingpynithuh kaba thok (fake identity).
