Shillong, Nailur, 20: Uwei u dkhot ba la pyndem wait jong ka seng kieng atiar Hynñiewtrep National Liberation Council u la shah kem ha ki Pulit ha ka miet sngi Palei halor ka jingdonkti ban dawa pisa na ki heh saipan hadien ba la sam ïa ki shithi dawa pisa jong ka HNLC.
Ïa une u dkhot ba la pyndem wait jong ka seng HNLC la tip kyrteng kum u Sromwell Mawdoh, 41 snem ka rta la kem na iing sah jong u na ka shnong Umpling Dongsharum kaba hap hapoh ka Rynjah Police Station.
Ka khubor ba la ïohlum na ki Pulit ka ïathuh ba u Sromwell Mawdoh watla u la dei u dkhot ba la pyndem wait hynrei u dang donkti ban trei kum u nongkyrshan narieh narieh jong ka seng HNLC na ka bynta ban lum pisa bad namar ka jingdonkti halor kane ka kam, u la shah kem ha ki pulit jong ka Ribhoi District kiba la buddien bha halor ka jingshah dawa pisa jong ki katto katne ki heh saipan.
Halor kane ka jingjia, ki Pulit ki la register case pyrshah ïa ka jingsam shithi dawa pisa da ka seng HNLC sha ki nongkhaii heh spah kiba shong basah ha nongbah Shillong.
U Sromwell Mawdoh u dei uba la pyndem wait hakhmat ki Pulit jong ka East Khasi Hills District la katto katne snem mynshwa ryngkat bad u Frederick Kharmawphlang uba long u nongïalam barim jong ka Khasi Students Union (KSU).
