Nongstoiñ, Jymmang 10: Katkum ka jingujor ba la ai da ka kong B Ryntathiang ba shong ba sah ha New Nongstoiñ, la ong ba ha ka sngi nyngkong jong ka taiew ha ka por kumba 4 baje ei ei janmiet, ka khun jong ka ba dang 13 snem ka karta, ka la shah ktah kti bad thom bor ha uwei u bar jylla u ba ju shim tuition class ïa ka ha ïing sah wai jong u.
Une u bar jylla u dei u ba la tip kyrteng u Sanjay Thakur 24 snem bad la ong ba ha kane ka janmiet ba ka leit tuition, kiwei pat kiba ju leit tuition lang bad kim don satia. Kumta la ong ba u ne u Thakur u la shim kabu da kaba jrong kti ïa ka na ki bynta jong ka shadem bad ki bynta jong ka met. Hynrei kane ka khynnah ka la ïathuh ïa kaba la jia baroh sha ka kmie jong ka mar ïa poi ïing.
Na ka liang ki pulit ki la phah ïa kane ka khynnah ban examine ha kajuh ka sngi ba ka kmie jong ka, ka la pyntip bad ujor sha ki pulit kynthei. Katba ïa utei u bar jylla na ka liang ki pulit ki la bat noh bad mynta ka sngi pat la phah ïa u sha ïing bishar katkum ba la register case ha Nongstoiñ Police Station, 37(5) 2022 u.s 7/8 POCSO Act.
