Shillong, Lber 28: U Area Commander barim jong ka seng lehnoh kaba la shah kheiñ beaiñ ka Garo National Army Liberation (GNLA) u la shah kem noh ha ka sngi Thohdieng hadien ka jingkynnoh ba u la siat ïap ïa u nonghikai ha North Garo Hills district ha ka snem 2012.
“U Laben Ch Sangma ba la ju khot da u Chenang, u Area Commander barim ka GNLA Northern Zone u la shah kem hadien ba la kynnoh ba u la siat ïap ïa u Lt Denybirth G Momin, uba dei u nonghikai science & math ha Resubelpara higher secondary school uba la shah siat hakhmat kiba haïing ka sem bad ki khun kiba dang rit kiba la sakhi ïa kane ka jingjia ha ka snem 2012,” ïathuh uwei na ki pulit ophisar.
Na ka liang ki pulit ki la ïathuh ba la dep ban ujor da ka ejahar ne FIR ha Mendipathar police station ha ka snem 2012 ha kaba la ong ba ha ka 19 tarik u Naitung, 2012 ka kynhun jong ki lehnoh GNLA kiba don kumba 4-5 ngut ba la ïalam da u Laben Sangma ba ju khot u Chenang ki la leit sha ka ïing jong u Denybirth Momin ba la 23 snem ka rta ha ka shnong Resu Mepan Abri ki la siat ïap ïa u shabar ka ïing kaba hajan ka lynti ïaid kjat, da kaba kynnoh ba u dei u nongsyntiat jong ki pulit ne u nongsyntiat ka ANVC.
Na ka liang ki pulit ki la lap ruh ïa ki 3 tylli ki AK ammunition ba la thylli, 2 ki 9 mm ammunition ba la thylli bad kawei ka shithi ba la soi da ka GNLA kaba la thoh ruh da u area commander ka GNLA, kaba la kam ba ka donkti ha ka ban pynïap bad kaba la shem ruh ha kane ka jaka.
