Shillong, Nailur, 18: Saw ngut ki briew kiba donkti ban dawa pisa ki la shah kem noh ha ki Pulit jong ka East Khasi Hills ha ka sngi Baar mynta ka taiew.
Kine ki saw ngut ki kynthup ïa u Garnett Gedian Khongwir, 30 snem ka rta bad u Bah Kyrshanbor Lyngdoh, 38 snem ka rta kiba dei ki dkhot jong ka Hynñiewtrep National Youth Movement (HNYM). Katba arngut kiwei pat ki dei kiba la tip kyrteng kum u Thounaujam David Singh, 41 snem ka rta bad u Narendra Kabrambam, 29 snem ka rta.
U Superintendent of Police jong ka East Khasi Hills Bah S. Nongtnger ha u kyrwoh ba la phah sha ki lad pathai khubor ha ka sngi Balang u la pyntip ba ha ka 24 tarik, Nailar, 2024, la ïa ka ujor la mudui ha Madanrting Police Station ba ha ka 8 tarik, Nailar, 2024, uwei u shynrang briew bym lah ban tip kyrteng u la telephone ïa u nongujor ha ka por kumba 7:00 baje mynmiet bad dawa pisa jubor haduh T. 10,00,000 lak.
Hadien kata, une u briew uba ym lah ban ithuh u la telephone la bun bun sien ïa u nongujor da kaba pynbor ban siew noh mardor ïa ka pisa ba la dawa. Hynrei, namarba u nongujor um shym la kohnguh satia ban pyndem ha u nongdawa, u nongdawa pisa ryngkat bad arngut kiba donkti ban ïasylla ki la rung jubor hapoh ka iing sah jong u nongujor ha ka 20 tarik, Nailar, 2024, da ka jingthmu ban lute ïa ka pisa. Namarba u nongujor um don satia hapoh iing ha kane ka por, kine ki nongdawa pisa ki la byrngem byrsit ïa ka khun kynthei jong u nongujor ba kin sa pyni da ka bor.
Ha kaba ïadei bad kane, ki Pulit ki la register da ka criminal case ha Madanrting Police Station bad ha ka jingtohkit ki Pulit ki la ïoh kem noh ïa ki saw ngut ki briew kiba donkti.
U SP u la ïathuh ba ka jingtohkit halor kane ka jingjia ka dang ïaid shakhmat ban lap ïa ki jingshisha.
