Nongstoiñ, Ïaiong 09: Ki Pulit ANTF ka West Khasi Hills hynnin ka miet ki la ïoh ban kem ïa kumba saw ngut ki nongkhaïi drok bad ïoh kurup ruh bun bah u drok heroin bad u kynja.
Katkum ka khubor Pulit, la ong ba ki la ïoh khubor ba don lai ngut ki nongkhaïi drok na Nongstoiñ kiba leit thied drok na Assam bad dei ban wanphai biang sha Nongstoiñ lyngba ka surok Langpih-Nongstoiñ.
Ka kynhun jong ka ANTF ka la pynap shrip ïa kine ki briew hynnin ka janmiet sngi ba ar ha shnong Nonglang bad ki la ïoh bat ïa kine ki briew katba kiba wan da kawei ka kali ba don u nombor ML06-A-1450.
Kine ki lai ngut ba la shah kem ki long u Bryan Kharbani ba 29 snem na New Nongstoiñ, u Donkerry Ryntathiang ba 25 snem na New Nongstoiñ bad u Morningstar L Rngaid ba 31 snem na Pyndengrei dong Mawkhmahwir.
Na ka met kine ki briew, ki Pulit ki la ïoh kurup haduh 15 gram u heroin bad kiwei ki tiar injek drok nalor ka mobile phone bad ka pisa. Ïa kine ki tiar la ïoh kurup ha ka jingdonlang ki nongai sakhi shimet.
Haba bteng ban khynra ïa ka kali kaba ñiah da u Kostarlin Ïawphniaw ba na Mawlai Syiem Eastern West Khasi Hills, ka ANTF ka la ïoh ban kurup sa 130 gram u kynja.
Ki Pulit ki la rah noh ïa kine ki briew sha Nongstoiñ bad la register case ïa ki hapoh ki kyndon ka NDPS ha Nongstoiñ Police Station. Ka jingtohkit mynta ka la ïaid shakhmat.
