Shillong, ïaïong, 08: Ki shipai BSF jong ka 172 Battalion Meghalaya Frontier, kiba la ïoh jingtip na ki tnat syntiat ki la ïoh bat lai ngut ki mynder Bangladeshi katba ki dang thmu ban rung tuh shapoh u pud u sam jong ka ri India lyngba ka khappud Meghalaya ha ka Lah Sngi u Blei.
Ha ka jingtohkit, kine ki lai ngut ki la phla ba ki dei ki bashong basah ha Sylhet District, Bangladesh.
Ïa kine ki lai ngut ki shipai BSF ki la aiti noh sha ki Pulit jong ka Umkiang Police Patrol Post, East Jaiñtia Hills na ka bynta ban leh katkum ki kyndon jong ka aiñ.
