Shah kem haduh 3 ngut ki samla Khasi ha ki Pulit ka Assam ha Block II

Nongpoh, Ïaïong 11: Ha kaba ïa dei bad ka jingjia ha Jatalong dang shen ba 3 ngut ki samla Khasi ki la shah shoh pynmynsaw ha ki jaid Bynriew Nepali ba ki bor synshar District na Ri Bhoi District bad na West Karbi Anglong ruh ki la pyrkhing bha ïa ka ïaid ka ieng ki paidbah, hynrei tang hadien khyndiat sngi na katei ka jingjia mynta ka sngi pat la kynnoh ba 3 ngut ki samla Khasi na ka Shnong Sabuda ki la shah kem ha ki Pulit ka Assam khlem da tip ïa ka daw tynrai.
Kumba la ïoh lum jingtip, kitei ki 3 ngut ki samla Khasi ba la shah kynnoh ba ki la shah kem ha ki Pulit ka Assam la tip kyrteng kum u Barson Lawai, Standing Khriam bad u Dispar Mukhim, kiba dei ki nongshong shnong ka Shnong Sabuda bad la kynnoh ruh ba ki Pulit ka Assam ki la kem na Umpaklong kaba don hajan ka Wah Umler.
Kum ban pynpaw, dang shen ka jinghuri hura ka la mih hapdeng ki Khasi bad ki Nepali, ka dei hadien ba ki 3 ngut ki samla Khasi ki la shah shoh ha ki Nepali bad halor kane ka bynta ki bor synshar District na West Karbi Anglong bad na Ri Bhoi District namar ba ka dei ka jak aba dang kajia pur ki la buh ïa ka jingpyrkhing halor ka ïaid ka ieng ki paidbah bad mynta ka sngi pat la ïoh jingtip ba kitei ki 3 ngut ki la shah kem wat la ki dei ki trai shnong khlem da tip na kano kano ka daw ba ki Pulit ka Assam ki la kem ïa ki bad la rah noh sha Ulukanchi na ka bynta ka jingtohkit.
Kumba la ïoh lum jingtip ruh na uwei na u nongïalam Shnong katei ka thaiñ, la ong ba kine ki samla ki la shah kem da kaba ki Pulit ka Assam ki la kynnoh ba ki thmu ban thang ïa ka jingkieng Wah Umler bad halor kane ka jingkynoh ki Pulit ka Assam kum ki paidbah nongshong shnong kim lah ban pdaing bad ka lah ban dei tang ka jingshim kabu na katei ka jingjia kaba la jia ha ka shnong Jatalong.
Halor kane ka bynta, ki Nongïalam Shnong ki la ïathuh ruh ba lashai ka sngi kin sa ai da ka jingthïoh sha u Deputy Commissioner ka Ri Bhoi ba un ïa kren halor kane ka bynta ba kitei ki 3 ngut ki samla ki la shah kem ha ki Pulit ka Assam bad kin sa buhr uh ka jingkhrpad ba ïa katei ka jingshah kem bad shah tohkit dei ban aiti sha ki Pulit ka Ri Bhoi namar ba kitei ki samla ba shah kem ki dei ki Samla Khasi bad kim lah ban shaniah ha ki Pulit ka Assam.
Halor kane ka jingjia, na ka liang u Nongthoh Khubor u Mawphor u la pyrshang ruh ban wad jingtip da ki bor synshar District ka Ri Bhoi, da kaba phone ïa u Additional Deputy Commissioner ka Ri Bhoi, u Bah M.B Tongper, namar ba u Deputy Commisioner u dang don ha ka shuti (On Leave) bad katkum ba la ïoh lum jingtip na Additional Deputy Commissioner la ong ba haduh mynta kim pat ïoh pdiang kano kano ka jingujor na ki nongïalam shnong ne ki bahaing jong kitei ki samla ba la shah kem bad halor kane ka jingjia, na ka liang ka bor synshar District ki la phah ban leit jurip da u Border Magistrate bad kum ka bor synshar District ki dang ap mynta ïa ka kaiphod na u Border Magistrate halor kane ka jingjia ba la kynnoh haduh 3 ngut ki samla Khasi ki la shah kem ha ki Pulit ka Assam.