Shillong, Risaw, 24: Ki shipai BSF, Meghalaya jong ka 193rd Battalion ha ka sngi Palei ki la ïoh kurup ïa ki masi bad ïa u rynsun ba la thmu ban shalan tuh sha ka ri Bangladesh bad ïoh kem ruh ïa ki arngut ki nong India bad kurup ar tylli ki kali ba la thep ïa u rynsun bad ïa ki masi kiba shongdor palat T.6 lak najan khappud jong ka jylla Meghalaya hapoh ki 48 kynta ba la leit noh.
Ïa ki masi bad ïa u rynsun la thmu ban shalan tuh sha ka ri Bangladesh lyngba ka khappud jong ka East Khasi Hills district.
Ki shipai BSF ki la ïoh bat ïa kawei ka kali Maruti Alto kaba don ïa u nombar ML-10-8979 ba la thep saw tylli ki masi ba la thmu khaii sha Bangladesh. Ïa u nongñiah bad ïa ka kali lem bad ki masi la aiti noh sha ki Pulit jong ka Dangar Police Outpost.
Ha kawei pat ka jingkhynra, ki shipai BSF jong ka 110th Battalion ki la ïoh bat ïa kawei ka kali Bolero pickup hajan khappud ka East Khasi Hills kaba kit ïa u rynsun.
U nongñiah jong ka kali um shym la lah satia ban pyni ïa ki kot ki sla haba tohkit.
Ïa u nongñiah uba dei u nong India, ïa ka kali bad ïa u rynsun ba la kurup la aiti noh sha ka ophis Custom.
